កំណត់ត្រារបស់តុលាការ បង្ហាញថា លោក Hunter Biden ត្រូវតែបង្ហាញខ្លួន នៅថ្ងៃទី១១ ខែមករា ឆ្នាំ២០២៤ នៅតុលាការទីក្រុង Los Angeles ដើម្បីឆ្លើយតបទៅនឹងការចោទប្រកាន់របស់សហព័ន្ធ ដែលលោកបានខកខានក្នុងការបង់ពន្ធលើប្រាក់ចំណូលរាប់លានដុល្លារ ដែលរូបលោកទទួលបានពីអាជីវកម្មបរទេស។

បើយោងតាមគេហទំព័រផ្លូវការរបស់តុលាការ បានឲ្យដឹងថា ការកាត់ក្តីនឹងធ្វើឡើងនៅចំពោះមុខចៅក្រម លោកស្រី Alka Sagar នៅម៉ោង ១រសៀល (ម៉ោងនៅតំបន់ប៉ាស៊ីហ្វិក)។ កូនប្រុសរបស់ប្រធានាធិបតីអាមេរិកលោក Joe Biden រូបនេះ ត្រូវបានគេរំពឹងថា នឹងសារភាពពីភាពគ្មានទោស នៅក្នុងសវនាការរបស់លោក ជុំវិញការចោទប្រកាន់ កាលពីថ្ងៃទី៨ ខែធ្នូ ដែលត្រូវបានធានាដោយទីប្រឹក្សាពិសេសលោក David Weiss។

សមាជិកសភាមកពីគណបក្សសាធារណរដ្ឋ បានធ្វើជំនួញក្រៅប្រទេសរបស់លោក Hunter Biden ក្លាយជាទីផ្ដោតអារម្មណ៍លើការស៊ើបអង្កេតនៃការចោទប្រកាន់របស់ពួកគេ ចំពោះឪពុករបស់លោក។

គណៈវិនិច្ឆ័យធំរបស់សហព័ន្ធ បានចោទប្រកាន់លោក Hunter Biden កាលពីសប្តាហ៍មុន ពីបទខកខានមិនបានបង់ពន្ធចំនួន ១,៤លានដុល្លារអាមេរិក ចន្លោះពីឆ្នាំ២០១៦ ដល់ឆ្នាំ២០១៩ ខណៈដែលរូបលោកបានចំណាយប្រាក់រាប់លានដុល្លារលើជីវិតប្រើប្រាស់គ្រឿងញៀន រួមដោយការចំណាយលើរថយន្តអមដំណើរ រថយន្តល្បឿនលឿន និងសណ្ឋាគារប្រណីត ដោយភាគច្រើននៃពេលវេលានោះ រូបលោកស្ថិតនៅក្រោមការគ្រប់គ្រងនៃឥទ្ធិពលគ្រឿងញៀន។

លោក Hunter Biden វ័យ ៥៣ឆ្នាំរូបនេះ អាចប្រឈមនឹងការជាប់ពន្ធនាគារ ១៧ឆ្នាំ ប្រសិនបើត្រូវបានកាត់ទោសពីបទឧក្រិដ្ឋទាំង ៣ករណី និងបទមជ្ឈិមចំនួន ៦ករណី ក្នុងការចោទប្រកាន់របស់លោក៕