សមាជិកសភាសហព័ន្ធចំនួន៧៨នាក់ មកពីគណបក្សនយោបាយប្រឆាំងផ្សេងៗគ្នា ត្រូវបានផ្អាកសុពលភាព កាលពីថ្ងៃចន្ទសម្រាប់ផ្នែកដែលនៅសល់នៃសម័យប្រជុំដែលនៅបន្ត ពី«ការរំខានដល់ដំណើរការសភាម្តងហើយម្តងទៀត» ។

ការផ្អាកសុពលភាព ដែលជាប់ពាក់ព័ន្ធជាមួយសមាជិកសភា៣៣រូបមកពីសភាជាន់ទាបឥណ្ឌា Lok Sabha និង៤៥រូប មកពីសភាជាន់ខ្ពស់ Rajya Sabha ត្រូវបានចាត់ទុកថាជាការផ្អាកសុពលភាពសមាជិកសភាទ្រង់ទ្រាយធំបំផុតនៅក្នុងប្រវត្តិសាស្ត្រសភារបស់ប្រទេសឥណ្ឌា។ កាលពីសប្តាហ៍មុន សមាជិកសភា ១៤រូប រួមទាំង១៣រូបមកពីសភាជាន់ទាប Lok Sabha និង១រូបមកពីសភាជាន់ខ្ពស់ Rajya Sabha ត្រូវបានផ្អាកសុពលភាពដោយសារតែ «អាកប្បកិរិយាមិនសមរម្យ» របស់ពួកគេក្នុងអំឡុងពេលដំណើរការសភា។

កាលពីសប្តាហ៍មុន សមាជិកសភាត្រូវបានផ្អាកការងារ បន្ទាប់ពីពួកគេបានបង្ខំឱ្យពន្យារពេលប្រជុំម្តងហើយម្តងទៀត ខណៈមានការលើកឡើងពីបញ្ហាបំពានសន្តិសុខខាងក្នុងសភា កាលពីថ្ងៃទី ១៣ ខែធ្នូ នៅពេលដែលយុវជនពីរនាក់បានលោតចូលទៅក្នុងសភាជាន់ទាប Lok Sabha ពីសាលអ្នកចូលទស្សនា ហើយបានបាញ់កំប៉ុងផ្សែង ខណៈលើកពាក្យស្លោកប្រឆាំងរដ្ឋាភិបាលសហព័ន្ធ។

នាយករដ្ឋមន្ត្រីឥណ្ឌា លោក Narendra Modi បាននិយាយកាលពីថ្ងៃអាទិត្យថា ឧប្បត្តិហេតុរំលោភបំពានសន្តិសុខ មានស្ថានភាព «ធ្ងន់ធ្ងរ» ។ សមាជិកសភាបក្សប្រឆាំងដែលត្រូវបានផ្អាកសុពលភាព កាលពីថ្ងៃចន្ទកំពុងទាមទារឱ្យលុបចោលការផ្អាកនេះ រួមទាំងសេចក្តីថ្លែងការណ៍ ពីរដ្ឋមន្ត្រីក្រសួងសន្តិសុខផ្ទៃក្នុងសហព័ន្ធ លោក Amit Shah ជុំវិញឧប្បត្តិហេតុបំពានសន្តិសុខសភាកាលពីសប្តាហ៍មុន។