នាយករដ្ឋមន្ត្រីលោក Dorin Recean បាននិយាយកាលពីថ្ងៃចន្ទ (ទី១៨ ខែធ្នូ) ថា ប្រទេសម៉ុលដូវ៉ា ត្រូវការប្រព័ន្ធការពារប្រឆាំងយន្តហោះ ដែលត្រូវបានធ្វើឲ្យប្រសើរឡើង ដើម្បីទប់ទល់នឹងការគំរាមកំហែងពីប្រទេសរុស្ស៊ី ដែលកើនឡើងដោយការលុកលុយរបស់ទីក្រុងមូស្គូលើអ៊ុយក្រែន ដែលជាប្រទេសជិតខាងភាគខាងកើតរបស់ខ្លួន។

លោក Recean កំពុងនិយាយទៅកាន់អ្នកសម្ភាសន៍តាមទូរទស្សន៍ ដែលមានរយៈពេល ៣ថ្ងៃបន្ទាប់ពីសភារបស់ប្រទេសម៉ុលដូវ៉ា បានអនុម័តយុទ្ធសាស្ត្រសន្តិសុខថ្មី ដែលកំណត់ទីក្រុងមូស្គូថា ជាការគំរាមកំហែងសន្តិសុខដ៏ធំបំផុតសម្រាប់ប្រទេស និងរដ្ឋាភិបាលដែលគាំទ្រអឺរ៉ុប។ ហើយប្រធានាធិបតីម៉ុលដូវ៉ា លោកស្រី Maia Sandu បានបរិហារការលុកលុយរបស់រុស្ស៊ីលើអ៊ុយក្រែន និងបានចោទប្រកាន់វិមានក្រឹមឡាំងថា បានរៀបចំផែនការទម្លាក់លោកស្រី។

សហភាពអឺរ៉ុប កាលពីសប្តាហ៍មុន បានយល់ព្រមចាប់ផ្តើមកិច្ចពិភាក្សាស្តីពីការពង្រីកសមាជិកភាពរបស់ខ្លួនជាមួយទាំងប្រទេសម៉ុលដូវ៉ា និងអ៊ុយក្រែន។ ប៉ុន្តែមិនដូចអ៊ុយក្រែនទេ ម៉ុលដូវ៉ាមានឋានៈអព្យាក្រឹត ក្នុងរដ្ឋធម្មនុញ្ញរបស់ខ្លួន ហើយមិនស្វែងរកសមាជិកភាពនៃសម្ព័ន្ធភាពអាត្លង់ទិក។

លោក Recean បាននិយាយថា ដោយមានជំនួយពីសម្ព័ន្ធមិត្ត គឺសហភាពអឺរ៉ុប និងអង្គការ NATO ម៉ុលដូវ៉ាមានបំណងចង់ទទួលបានប្រព័ន្ធការពារអាកាសទំនើប ដើម្បីការពារអាកាសយានដ្ឋាន និងទីតាំងហេដ្ឋារចនាសម្ព័ន្ធសំខាន់ៗរបស់ខ្លួន៕