ប្រធានាធិបតីប្រទេសកូរ៉េខាងត្បូង លោក Yoon Suk Yeol បាននិយាយនៅថ្ងៃអង្គារនេះថា ប្រទេសកូរ៉េខាងជើង នឹងដឹងថា ការបង្កហេតុ នឹងនាំមកនូវភាពកាន់តែលំបាកបន្ថែមទៀតចំពោះប្រទេសនេះ។

លោក Yoon បានដូច្នេះនៅក្នុងកិច្ចប្រជុំគណៈរដ្ឋមន្ត្រី មួយថ្ងៃបន្ទាប់ពីប្រទេសកូរ៉េខាងជើងបានបាញ់មីស៊ីលបាលីស្ទីកអន្តរទ្វីប(ICBM)ថ្មីបំផុតរបស់ខ្លួន។ លោកប្រធានាធិបតី និយាយថា រដ្ឋាភិបាលរបស់លោក នឹងគាំទ្រយ៉ាងរឹងមាំប្រជាជនកូរ៉េខាងត្បូងដើម្បីរស់នៅគ្មានការព្រួយបារម្ភអំពីអាវុធនុយក្លេអ៊ែររបស់ប្រទេសកូរ៉េខាងជើង។

ប្រទេសកូរ៉េខាងត្បូង និងប្រទេសជប៉ុន បាននិយាយដោយផ្អែកលើទិន្ន័យជើងហោះហើរកាលពីថ្ងៃចន្ទថា ទីក្រុងព្យុងយ៉ាងបានបាញ់មីស៊ីល ICBM រយៈចម្ងាយឆ្ងាយ បាញ់ដល់ទីកន្លែងណាមួយនៅក្នុងសហរដ្ឋអាមេរិក។

លោក Yoon ជាអ្នកដែលបានប្រកាន់ជំហរតឹងរ៉ឹងប្រឆាំងទីក្រុងព្យុងយ៉ាង ចាប់តាំងពីឡើងកាន់ដំណែងកាលពីឆ្នាំមុន ដោយបានថ្កោលទោសការបាញ់មីស៊ីលរបស់ប្រទេសកូរ៉េខាងជើង និងបានបញ្ជាក់អំពីសម្ព័ន្ធមិត្តជិតស្និតរវាងសហរដ្ឋអាមេរិក និងកូរ៉េខាងត្បូង។

សហរដ្ឋអាមេរិក និងកូរ៉េខាងត្បូង បានបង្កើនភាពសកម្មនៃសមយុទ្ធយោធារួមគ្នា ប្រឆាំងការគំរាមកំហែងពីប្រទេសកូរ៉េខាងជើង ដែលបានសាកល្បងមីស៊ីលបាលីស្ទីករយៈចម្ងាយឆ្ងាយ ហើយកាលពីខែវិច្ឆិកា បានបាញ់បង្ហោះផ្កាយរណបចារកម្មយោធាលើកដំបូងរបស់ខ្លួន។