នៅថ្ងៃអង្គារនេះ រដ្ឋមន្រ្តីការពារជាតិសហរដ្ឋអាមេរិកលោក Lloyd Austin បានប្រកាសការបង្កើតប្រតិបត្តិការពហុជាតិ ដើម្បីការពារពាណិជ្ជកម្មនៅក្នុងសមុទ្រក្រហម បន្ទាប់ពីការវាយប្រហារជាបន្តបន្ទាប់ដោយមីស៊ីល និងយានដ្រូនរបស់ក្រុមឧទ្ទាមហ៊ូធីយេម៉ែនគាំទ្រដោយអ៊ីរ៉ង់ ។

លោក Austin ដែលស្ថិតក្នុងដំណើរទៅកាន់ប្រទេសបារ៉ែន បានបំពេញទស្សនកិច្ចទៅកាន់ទីបញ្ជាការកងទ័ពជើងទឹកសហរដ្ឋអាមេរិកនៅក្នុងតំបន់មជ្ឈិមបូព៌ា ហើយលោកនិយាយថា ប្រទេសចូលរួម មានទាំងចក្រភពអង់គ្លេស បារ៉ែន កាណាដា បារាំង អ៊ីតាលី ហូឡង់ ន័រវែស សីស្ហែល និងអេស្ប៉ាញ ។

លោកថា ពួកគេនឹងល្បាតរួមគ្នានៅតំបន់ភាគខាងត្បូងសមុទ្រក្រហម និងឈូងសមុទ្រអាដែន ។

លោក Austin បាននិយាយនៅក្នុងសេចក្តីថ្លែងការណ៍នៅព្រឹកថ្ងៃអង្គារនេះថា នេះគឺជាការងារប្រឈមអន្តរជាតិដែលទាមទារសកម្មភាពសមូហភាព ។ ដូច្នេះហើយ នៅថ្ងៃនេះ លោកសូមប្រកាសការបង្កើតប្រតិបត្តិការការពារវិបុលភាព ដែលជាបណ្តើមគំនិតសន្តិសុខពហុជាតិថ្មីដ៏សំខាន់មួយ ។

គួរឲ្យដឹងថា កាលពីថ្ងៃចន្ទម្សិលមិញ Austin បានធ្វើដំណើរមកដល់ប្រទេសអ៊ីស្រាអែល សម្រាប់កិច្ចប្រជុំផ្តោតសំខាន់លើការបញ្ចប់ជាយថាហេតុសង្រ្គាមដ៏ខ្លាំងក្លារបស់អ៊ីស្រាអែលនៅតំបន់ហ្គាហ្សា ហើយនិងការផ្លាស់ប្តូរទៅជាជម្លោះ មានដែនកំណត់ជាងមុន ។

លោក Austin បានពិភាក្សាលើផែនការរបស់អ៊ីស្រាអែលសម្រាប់ការផ្លាស់ប្តូរទៅកាន់ដំណាក់កាលបន្ទាប់នៃសង្រ្គាម អំឡុងជំនួបជាមួយក្រុមមេដឹកនាំជាន់ខ្ពស់អ៊ីស្រាអែល ដែលរួមទាំងលោកនាយករដ្ឋមន្រ្តី Benjamin Netanyahu និងរដ្ឋមន្រ្តីការពារជាតិអ៊ីស្រាអែលលោក Yoav Gallant ៕