ក្រុមអ្នកតវ៉ា នៅប្រទេសបង់ក្លាដែស នៅថ្ងៃអង្គារ (ទី១៩ ខែធ្នូ) នេះ បាននាំគ្នាដុតរថភ្លើង ដោយបានបណ្ដាលឲ្យមនុស្សយ៉ាងហោចណាស់ ៤នាក់ ស្លាប់ ចំពេលមានបាតុកម្មទូទាំងប្រទេស ដែលអំពាវនាវដោយក្រុមប្រឆាំង ដើម្បីជំរុញការទាមទាររបស់ខ្លួនឲ្យរដ្ឋាភិបាលលាលែងពីតំណែង នៅមុនការបោះឆ្នោត នាខែក្រោយ។

នេះគឺជាជម្លោះចុងក្រោយបង្អស់ ដែលបង្កឡើងដោយការតវ៉ាប្រឆាំងរដ្ឋាភិបាល ដែលរថយន្តក្រុង និងរថយន្តរាប់សិបគ្រឿង ត្រូវបានដុតបំផ្លាញ ហើយយ៉ាងហោចណាស់មនុស្ស ៦នាក់ បានបាត់បង់ជីវិត ចាប់តាំងពីថ្ងៃទី២៨ ខែតុលា នៅពេលដែលការប្រមូលផ្តុំរបស់គណបក្សប្រឆាំង បានប្រែក្លាយទៅជាហិង្សា។

មន្ត្រីសេវាពន្លត់អគ្គិភ័យ លោក Shahjahan Shikder បាននិយាយថា៖ «អ្នកគាំទ្រកូដកម្មបានដុតបំផ្លាញទូរថភ្លើងចំនួន៣ របស់រថភ្លើងលឿន។ សព ៤នាក់ ត្រូវបានយកពីទូមួយ»។

ចំណែកនគរបាលបានប្រាប់ថា ភ្លាមៗ នៅមិនទាន់ដឹងច្បាស់ទេថា តើមានមនុស្សប៉ុន្មាននាក់ នៅលើរថភ្លើង ដែលធ្វើដំណើរឆ្ពោះទៅកាន់រដ្ឋធានី Dhaka ពីស្រុកភាគខាងជើងនៃទីក្រុង Netrokona នៅពេលដែលអ្នកដំណើរបានឃើញអណ្តាតភ្លើងឆាបឆេះឡើង នៅចម្ងាយ ដែលរថភ្លើងជិតដល់គៅលដៅហើយ។ ភ្លាមៗនេះ មិនមានការអត្ថាធិប្បាយពីរដ្ឋាភិបាលនោះឡើយ។

ដោយមេដឹកនាំជាន់ខ្ពស់របស់ខ្លួនទាំងត្រូវបានផ្ដន្ទាទោសឲ្យជាប់ពន្ធនាគារ ឬនិរទេសខ្លួន គណបក្សជាតិនិយមបង់ក្លាដែស (BNP) ចង់ឲ្យនាយករដ្ឋមន្ត្រី លោកស្រី Sheikh Hasina ចុះចេញពីដំណែង និងបើកផ្លូវឲ្យមានរដ្ឋាភិបាលអព្យាក្រឹតមួយ ដើម្បីត្រួតពិនិត្យការបោះឆ្នោត នៅថ្ងៃទី៧ ខែមករា ដែលខ្លួនបានធ្វើពហិការ។ លោកស្រី Hasina ដែលកំពុងស្វែងរកអាណត្តិទី៤ ជាប់ៗគ្នា ក្នុងចំណោម ៥អាណត្តិរបស់លោកស្រី បានច្រានចោលការអំពាវនាវរបស់គណបក្សប្រឆាំងម្តងហើយម្តងទៀត ដោយបន្ទោសគណបក្ស BNP ចំពោះការតវ៉ាតាមដងផ្លូវ ដែលបានបណ្ដាលឲ្យមានអ្នកស្លាប់ថ្មីៗនេះ ដើម្បីគាំទ្រការទាមទាររបស់ពួកគេ៕