ជនសង្ស័យ ៤នាក់ ត្រូវបានចាប់ខ្លួន ក្រោយបំពានសន្តិសុខធ្ងន់ធ្ងរនៅក្នុងរដ្ឋសភាឥណ្ឌាកាលពីថ្ងៃពុធសប្តាហ៍មុន នៅថ្ងៃខួបលើកទី ២២នៃការវាយប្រហារសម្លាប់មនុស្សមកលើបរិវេនអគារសភាមួយនេះ។

ឥណ្ឌានិយាយនៅថ្ងៃអង្គារនេះថា ជនឈ្លានពានដែលបានលោតចូលបរិវេនតំណាងរាស្រ្ត មានកំប៉ុងផ្សែងលាក់ក្នុងស្បែកជើងរបស់គាត់ដែលក្រោយមកចេញផ្សែងធ្វើឲ្យក្រុមតំណាងរាស្រ្តរត់គេចចេញពីអគារសភា ។

នាយកមន្រ្តីឥណ្ឌាលោក Narendra Modi ពុំមានវត្តមាននៅទីនោះទេ នៅពេលនោះ។ ក្រោយមករដ្ឋសភាបានបញ្ឈប់ដំណើរការ បន្ទាប់ពីឧបទ្ទេវហេតុកើតឡើង ប៉ុន្តែពួកគេចាប់ផ្តើមឡើងវិញនៅរយៈពេលប្រហែល ១ម៉ោងក្រោយមក។

ឧបទ្ទេវហេតុនេះដែរ បានកើតឡើងនៅក្នុងអគារសភាថ្មីដែលមានការរឹតបន្តឹងសន្តិសុខខ្ពស់ និងជាអគារដែលត្រូវបានសម្ពោធន៍ដាក់ឲ្យប្រើប្រាស់ដោយលោក Modiកាលពីខែឧសភា ។

សូមបញ្ជាក់ថា កាលពីឆ្នាំ២០០១ មនុស្សរាប់សិបនាក់ រួមទាំងខ្មាន់កាំភ្លើង ៥នាក់ ត្រូវបានសម្លាប់នៅក្នុងការវាយប្រហារមួយមកលើអគារចាស់ក្នុងបរិវេនសភាតែមួយ ដែលទីក្រុងញូវដែល្លី ដាក់ការស្តីបន្ទោសលើក្រុមជីវពលដែលមានមូលដ្ឋាននៅប្រទេសប៉ាគីស្ថាន៕