​ចិន៖ អវកាសយានិក​ដំបូង​បាន​ទៅដល់​ស្ថានីយ​អវកាស​ថ្មី​ របស់​ប្រទេស​ចិន​នៅ​ថ្ងៃ​ព្រហស្បតិ៍ ក្នុង​បេសកកម្ម​មាន​ផ្ទុកអវកាសយានិក​ក្នុង​រយៈពេល​យូ​បំផុត​របស់​ប្រទេស ដែល​ជា​ជំហាន​សំខាន់​ក្នុង​ការ​ធ្វើ​ឲ្យ​ទីក្រុង​ប៉េកាំង​ក្លាយ​ជាមហាអំណាច​អវកាស​ធំ​មួយ​។ ការ​បាញ់​បង្ហោះ​យាន​​ផ្ទុក​អវកាសយានិក​ទាំង​ ៣​រូប​ត្រូវ​បាន​ធ្វើឡើង​ចេញពី​មូលដ្ឋាន​បាញ់​បង្ហោះ Jiuquan ភាគ​ពាយព្យ​ប្រទេស​ចិន​។

​អវកាសយានិក​ទាំង ៣​រូប​ដែល​ត្រូវជា​ក្រុម​ដំបូង​គេ​នៃ​បេសកកម្ម​នេះ នឹង​ត្រូវ​ស្នាក់នៅ​ក្នុង​បន្ទប់​ស្ថានីយ​អវកាស​ចិន ដែល​កំពុង​ស្ថិត​ក្នុង​ដំណាក់​កាល​សាងសង់​រយៈពេល ​០៣​ខែ​។ យាន​អវកាស Shenzhou-12 ត្រូវ​បាន​ផ្ដាច់​ខ្លួន​ចេញពី​គ្រាប់​រ៉ុក្កែត Long March-2F Y12 នៅ​ក្រោយ​រយៈពេល ​៥៧៣​វិនាទី​នៃ​ការ​បាញ់​បង្ហោះ​ចេញពី​ផ្ទៃ​ផែន​ដី​។ ​យាន Shenzhou-12 និង​អវកាសយានិក​ ៣​រូប​ត្រូវ​បំពេញ​បេសកកម្ម​ ដើម្បី​កសាង​ស្ថានីយ​អវកាស​ថ្មី​ឲ្យ​រួចរាល់នៅ​អំឡុង​ចុង​ឆ្នាំ​២០២២​។

​ទូរទស្សន៍​រដ្ឋ​ CCTV បាន​បង្ហាញ​ពី​ការផ្សាយ​ផ្ទាល់​ពី​ខាងក្នុង​យានអវកាស អំឡុង​ពេល​ធ្វើដំណើរ​ដោយ​អវកាសយានិក​ទាំង ​៣នាក់​បាន​លើក​មួក​សុវត្ថិភាព​របស់​ពួកគេ​ បន្ទាប់ពី​បាន​ទៅដល់​គន្លង​តារាវិថី​ ខណៈ​បាន​ញញឹម​ និង​គ្រវី​ដៃ​ដាក់​កាមេរ៉ា​។ ប្រធាន​រដ្ឋបាល​អង្គការ NASA លោក Bill Nelson បាន​អបអរ​ប្រទេស​ចិន​ លើ​ការ​បាញ់​បង្ហោះយានអវកាស​មាន​អាវ​កាស​យានិក​ ៣រូប​ទៅកាន់​អវកាស​ ដោយ​បាន​និយាយ​ក្នុង​សេចក្តី​ថ្លែងការណ៍​ថា រងចាំ​របក​គំហើញ​វិទ្យាសាស្ត្រ​មកដល់​៕

អត្ថបទ៖ ប៊ុនថន