កំពង់ឆ្នាំង៖ នៅថ្ងៃទី២០ ខែធ្នូ ឆ្នាំ២០២៣នេះ អ្នកធ្វើប្រហុកលក់តាមបណ្តាខេត្តបានអោយដឹងថា គាត់ធ្វើប្រហុកបានពី៣ទៅ៤តោនក្នុង១ថ្ងៃ ព្រោះរយៈពេល៣ថ្ងៃមកនេះត្រីប្រហុកចាប់ផ្តើមត្រូវជាបន្តបន្ទាប់ ក៏ប៉ុន្តែមិនទាន់ត្រូវច្រើននៅឡើយ។ ដោយឡែកប្រជានេសាទដាក់មងវិញ អាចរកបានចាប់ពី២៥ទៅ៣០គីឡូក្នុង១ទូក ហើយអ្នកដាក់របាំងសាច់អួនអាចរកបាន១០០គីឡូក្រាមផងដែរ។

 ម្ចាស់ដេប៉ូធ្វើប្រហុកមួយកន្លែងនៅមាត់ទឹកក្នុងឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំងបានអោយដឹងថា៖ រយៈពេល៣ថ្ងៃមកនេះ គឺត្រីប្រហុកដែលគាត់ទិញមកនោះ បានពីអ្នកដាក់មង និងអ្នកដាក់របាំង ដែលក្នុង១ថ្ងៃអ្នកដាក់មងអាចរកបានប្រហែល៣០គីឡូក្រាម ដោយឡែកអ្នកដាក់របាំងសាច់អួនបានប្រហែល១០០គីឡូក្រាម ហើយត្រីប្រហុកចាប់ផ្តើមត្រូវនៅក្នុងខ្នើតនេះ ។ រយៈពេល៣ថ្ងៃនេះ គាត់អាចផលិតប្រហុកបានចាប់ពី៣ទៅ៤តោន និងថ្ងៃខ្លះលោតដល់៥តោនក្នុង១ថ្ងៃ ហើយកម្លាំងកម្មករដែលគាត់ប្រើ គឺមានរហូតដល់១០០នាក់ក្នុង១ថ្ងៃ និងទទួលបានប្រាក់ចាប់ពី៦ម៉ឺនរៀលឡើងទៅ។

ចំណែកប្រជានេសាទត្រីប្រហុក និងកម្មករធ្វើប្រហុកបានអោយដឹងដែរថា៖ រយៈពេលប៉ុន្មានថ្ងៃមកនេះ ពួកគាត់សប្បាយចិត្តនឹងត្រីប្រហុកត្រូវជាងរាល់ថ្ងៃ ដែលនាំអោយពួកគាត់មានការងារធ្វើច្រើន និងទទួលបានប្រាក់ចំណូលខ្ពស់សំរាប់គ្រួសារ ក្នុងថ្ងៃគាត់អាចរកចំណូលបានពី៣ម៉ឺនទៅ៦ម៉ឺនរៀល និងពេលខ្លះក៏បានលើសហ្នឹងដែរ។ ចំពោះប្រជានេសាទវិញអោយដឹងថា គាត់នេសាទត្រីបានច្រើនក្នុងរយៈពេល២ទៅ៣ថ្ងៃនេះ ហើយគាត់សប្បាយចិត្តខ្លាំងដោយឃើញផលត្រីឆ្នាំនេះ ចាប់ត្រូវពីខ្នើតនេះទៅហើយ កាលណាគាត់នេសាទត្រីបានច្រើន គាត់ក៏ទទួលបានចំណូលខ្ពស់ពីការនេសាទនេះដែរ។ ម្យ៉ាងទៀតដោយសារមានការបង្ក្រាបបទល្មើសនេសាទជាបន្តបន្ទាប់ ធ្វើអោយត្រីឆ្នាំនេះឆាប់ទទួលបានផលផងដែរ។

លោក ងិន ហ៊ុន ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ឆ្នាំងបានអោយដឹងថា៖ ការបង្ក្រាបបទល្មើសនេសាទ ត្រូវបានធ្វើជាប្រចាំ និងមិនអោយកើតមាននៅក្នុងទឹកដីខេត្កតកំពង់ឆ្នាំងឡើយ ។ ពេលខ្លះជនខិលខូចនៅតែលួចដាក់បទល្មើសនេះ នៅតាមតំបន់ហាមឃាត់ តែក្រុមសមត្ថកិច្ចជលផលបានបង្ក្រាបបានទាន់ពេលវេលា ធ្វើអោយទិន្នផលត្រីឆ្នាំនេះ ឆាប់ត្រូវ និងមានត្រីក្នុងខ្នើតនេះ ៕ ដោយ ÷ កាំង ហុងវាស្នា