ភ្នំពេញ ៖ គម្រោងការផ្ទេរបច្ចេកវិទ្យាអំណោយផលល្អដល់បរិស្ថាន បានជួយដល់វិស័យឯកជន រោងចក្រ សហគ្រាស និងសិប្បកម្ម នៅក្នុង វិស័យកម្មន្តសាល លើការពង្រឹងប្រសិទ្ធភាពធនធាននិងថាមពល, ការគ្រប់គ្រងបរិស្ថាន, ការបង្កើនផលិតភាពនិងគុណភាព, ឱកាស បង្កើតនិងបង្កើនប្រាក់ចំណេញ និងបង្កើនភាពប្រកួតប្រជែង។

​ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងនៅក្នុងសិក្ខាសាលាកម្ម វិធីបិទបញ្ចប់គម្រោង ស្ដីពី «ការអភិវឌ្ឍដែលបញ្ចេញកាបូនតិចដើម្បីបង្កើនផលិតភាព និងកាត់បន្ថយការប្រែប្រួលអាកាសធាតុតាម រយៈការផ្ទេរបច្ចេកវិទ្យាអំណោយផលល្អដល់បរិស្ថាន» នៅថ្ងៃទី ១៩ ខែ ធ្នូ ឆ្នាំ២០២៣ នេះថា ជុំវិញគម្រោងខាងលើនេះ គឺជាគម្រោង ទីមួយ ដែលដាក់ឱ្យអនុវត្តនៅក្រោមក្របខ័ណ្ឌកម្មវិធីភាពជាដៃគូប្រចាំប្រទេស ដែលបានចុះហត្ថលេខាដោយផ្ទាល់ រវាងក្រសួងឧស្សា ហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងអង្គការសហប្រជាជាតិ ដើម្បីអភិវឌ្ឍន៍ឧស្សាហកម្ម ដលបានធ្វើឡើងនៅទីក្រុង វីយែន ប្រទេសអូទ្រីស នៅឆ្នាំ២០១៧ ។ 

ជាសង្ខេប, គម្រោងការផ្ទេរបច្ចេកវិទ្យាអំណោយផលល្អដល់បរិស្ថាន ដែលហៅកាត់ថា (TEST) នេះ បានជួយដល់វិស័យ ឯកជន រោងចក្រ សហគ្រាស និងសិប្បកម្ម នៅក្នុងវិស័យកម្មន្តសាល នៃព្រះរាជាណាចក្រកម្ពុជា លើការពង្រឹង ប្រសិទ្ធភាពធនធាន និងថាមពល, ការគ្រប់គ្រងបរិស្ថាន, ការបង្កើនផលិតភាពនិងគុណភាព, ដែលជាកាតាលីករ រួមចំណែកក្នុងការកាត់បន្ថយសំណល់ និងផលប៉ះពាល់ដល់បរិស្ថាន, កាត់បន្ថយថ្លៃដើម ដើម្បីបង្កើនឱកាសបង្កើត និងបង្កើនប្រាក់ចំណេញ និងបង្កើនភាពប្រកួតប្រជែង សម្រាប់ទីផ្សារក្នុងស្រុក, តំបន់ និងទីផ្សារអន្តរជាតិ។ ទាំងអស់នេះ ជាកត្តាដែលនាំឱ្យមានប្រសិទ្ធផលផ្នែកសេដ្ឋកិច្ច និងបរិស្ថានកាន់ តែប្រសើរឡើងដល់រោងចក្រ សហគ្រាស និងសិប្បកម្ម។

ឯកឧត្តម បន្តថា បញ្ហានេះ យើងឃើញថា ការប្រែប្រួលអាកាសធាតុ បានបង្ហាញឲ្យឃើញផលប៉ះពាល់អវិជ្ជមានជាសាកល។ ទន្ទឹមនឹងនេះ ការផលិត ការផ្ទេរ និងការប្រើប្រាស់បច្ចេកវិទ្យាដែលមានមេត្រីភាពបរិស្ថាន ក្នុងខ្សែច្រវ៉ាក់ផលិតកម្ម កំពុងដើរតួនាទី យ៉ាងសំខាន់ក្នុង ការចូលរួមកាត់បន្ថយបញ្ហាប្រឈមនេះ។ ចំណែកការផ្ទេរបច្ចេកវិទ្យាអំណោយផលដល់បរិស្ថាន គឺជាការផ្តួច ផ្តើមឧស្សាហកម្មបៃតង ដើម្បីជំរុញនិរន្តរភាព និងការប្រកួតប្រជែងរវាងសហគ្រាសធុនតូច និងមធ្យមនៅកម្ពុជា ហើយក៏នឹងជា ឧត្តមានុវត្តន៍មួយ លើការអភិវឌ្ឍធនធានមនុស្សនៅក្នុងវិស័យឧស្សាហកម្ម និងសិប្បកម្មផងដែរ។ បញ្ហានេះ, ក្រសួងឧស្សាហកម្ម វិទ្យា សាស្ត្រ បច្ចេកវិទ្យា និងនវានុវត្តន៍ និងក្រសួងបរិស្ថាន បានអនុវត្តគម្រោងវិធីសាស្ត្រ TEST នេះ រួមគ្នាដោយជោគជ័យ និងសម្រេចបាន លទ្ធផលជាច្រើនដូចជា៖ ភាពអនុលោមនៃផែនការយុទ្ធសាស្ត និងផែនការសកម្មភាពនៃប្រសិទ្ធភាពធនធាន និងផលិតកម្មស្អាត ២០២១-២០៣០, ភាពអនុលោមនៃគោលការណ៍ណែនាំកម្មវិធីពានរង្វាន់ឧស្សាហកម្មបៃតង ដែលជាកម្មវិធីដំបូងគេសម្រាប់វិស័យ នេះ, ការអនុវត្តកម្មវិធី ប្រកួតប្រជែងពានរង្វាន់ឧស្សាហកម្មបៃតងបានចំនួនបីដង, ការកសាងសមត្ថភាព និងផ្តល់ជំនួយបច្ចេកទេស ដល់រោងចក្រ សហគ្រាសចំនួន ៥៥, និងការលើកកម្ពស់សមត្ថភាព និងការយល់ដឹងដល់មន្រ្តី អ្នកជំនាញក្នុងស្រុកបុគ្គលិក រោងចក្រ សហគ្រាស គ្រូបង្រៀន បុគ្គលិកមន្ទីរពិសោធន៍ អ្នកចូលរួមកម្មវិធីរបស់គម្រោងនេះផងដែរ៕ អត្ថបទ៖ សុន រ៉ាឌី