ភ្នំពេញ៖ ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាបរធនបាល នៃសហគ្រិនខ្មែរ បានលើកទឹកចិត្តដល់សហគ្រិនទាំងអស់ ឱ្យខិតខំចាប់យកស្តង់ដារ បច្ចេកវិទ្យាទំនើប និងបង្កើនប្រសិទ្ធភាព ដើម្បីរួមចំណែកដល់ប្រព័ន្ធអេកូឡូស៊ីសហគ្រិនភាពនៅកម្ពុជា។

ក្នុងឱកាសអញ្ញើញជាអធិបតីភាពក្នុងកម្មវិធីប្រគល់ពានរង្វាន់សហគ្រិនខ្មែរ កាលពីល្ងាចថ្ងៃទី២០ ខែធ្នូ ឆ្នាំ២០២៣នេះ ឯកឧត្តមរដ្ឋមន្រ្តី បានមានប្រសាសន៍ថា សហគ្រិនខ្មែរ ជាកត្តាលីករជំរុញសហគ្រិនភាពនៅកម្ពុជា បានអនុវត្តកម្មវិធីជាច្រើនដែលផ្តល់អត្ថប្រយោជន៍ដល់សិស្សនិស្សិត ធុរកិច្ចបង្កើតថ្មី និងសហគ្រាសធុនតូច និងមធ្យម។ ឯកឧត្តមបានបន្តថា ក្នុងរយៈពេល ៣ឆ្នាំកន្លងមកនេះ សហគ្រិនខ្មែរ បានអនុវត្តតួនាទីដ៏សំខាន់របស់ខ្លួនដោយបានកំណត់ចំណុចកែលម្អ បង្កើនទំនុកចិត្តក្នុងចំណោមភាគីពាក់ព័ន្ធ សហការបង្កើតកម្មវិធីជាមួយដៃគូ និងពង្រឹងយន្តការសហហិរញ្ញប្បទាន។

ឯកឧត្តមបណ្ឌិត ឈៀង វណ្ណមុនិណ្ឌ នាយកប្រតិបត្តិសហគ្រិនខ្មែរ បានលើកឡើងថា ក្រោយការអនុវត្តកម្មវិធីប្រគល់ពានរង្វាន់សហគ្រិនខ្មែរ អស់រយៈពេលច្រើនឆ្នាំកន្លងមក សហគ្រិនខ្មែរបានសង្កេតឃើញថា កម្មវិធីនេះបានចូលរួមលើកស្ទួយដល់វិស័យសហគ្រិនភាពនៅកម្ពុជាឱ្យកាន់តែប្រសើរឡើង និងចូលរួមកសាងបណ្ដាញក្នុងប្រព័ន្ធអេកូឡូស៊ីសហគ្រិនភាពឱ្យកាន់តែមានភាពប្រទាក់ក្រឡា និងរឹងមាំ តាមរយៈការបង្កើតបរិយាកាសអំណោយផលដល់សហគ្រិនឱ្យបានចូលរួមសិក្សារៀនសូត្រ, សាកល្បងសមត្ថភាព , ឱកាសទទួលបានការវិនិយោគ និងបន្តពង្រីកអាជីវកម្ម។

 សូមជម្រាបជូនថា ឆ្នាំនេះ គឺជាឆ្នាំទី៣ហើយ ដែលសហគ្រិនខ្មែរ បានរៀបចំកម្មវិធីប្រគល់ពានរង្វាន់សហគ្រិន ក្នុងគោលបំណងលើកកម្ពស់រាល់សកម្មភាពក្នុងប្រព័ន្ធអេកូឡូស៊ីសហគ្រិនភាពនៅប្រទេសកម្ពុជា ផ្តល់ឱកាសដល់ការកសាងបណ្តាញទទួលបានប្រាក់រង្វាន់ និងការបណ្តុះបណ្តាល ចូលរួមការប្រកួតប្រជែងថ្នាក់ជាតិ និងអន្តរជាតិ និងកម្មវិធីគាំទ្រផ្សេងៗទៀត ដើម្បីជំរុញការរីកលូតលាស់ និងភាពជោគជ័យរបស់សហគ្រិនកម្ពុជា។ កម្មវីធីនេះដែរ សហគ្រិនខ្មែរ បានប្រកាសជ័យលាភីដែលជាក្រុម និងក្រុមហ៊ុនដែលបានឈ្នះការប្រកួតពានរង្វាន់សហគ្រិនខ្មែរទាំង ៣ប្រភេទ ប្រចាំឆ្នាំ២០២៣ គឺ៖ពានរង្វាន់កម្រិតវិទ្យាល័យ ពានរង្វាន់ធុរកិច្ចបង្កើតថ្មី និងពានរង្វាន់សហគ្រាសធុនតូច និងមធ្យម៕ ដោយ ៖ បូរ៉ាវី