អ្នកនាំពាក្យក្រសួងការបរទេសអាមេរិក កាលពីថ្ងៃអង្គារ (ទី១៩ ខែធ្នូ) លោក Matthew Miller បាននិយាយថា សហរដ្ឋអាមេរិកនឹងស្វាគមន៍ប្រទេសចិន ដែលដើរតួក្នុងន័យស្ថាបនា ក្នុងការព្យាយាមទប់ស្កាត់ការវាយប្រហារពីសំណាក់ក្រុមហ៊ូធីរបស់ប្រទេសយេម៉ែន ដែលមានសម្ព័ន្ធមិត្តជាមួយអ៊ីរ៉ង់ លើការដឹកជញ្ជូនអន្តរជាតិ។

ថ្លែងនៅក្នុងសន្និសីទសារព័ត៌មាន ដែលតែងធ្វើជាប្រចាំ លោក Miller បាននិយាយថា រដ្ឋមន្ត្រីការបរទេសអាមេរិក លោក Antony Blinken បានប្រាប់អ្នកការទូតជាន់ខ្ពស់របស់ចិន លោក Wang Yi តាមរយៈការសន្ទនាតាមទូរស័ព្ទនាពេលថ្មីៗនេះថា ការវាយប្រហារនេះ បានធ្វើឲ្យប៉ះពាល់ដល់ផលប្រយោជន៍របស់ប្រទេសទាំងអស់ ក្នុងនោះរួមទាំងសហរដ្ឋអាមេរិក និងចិនផងដែរ។

ការវាយប្រហារលើនាវា នៅក្នុងផ្លូវដឹកជញ្ជូនដ៏សំខាន់សមុទ្រក្រហម បានបង្កើនទិដ្ឋភាពនៃការរំខានមួយទៀតនៃពាណិជ្ជកម្មអន្តរជាតិ បន្ទាប់ពីការចលាចលនៃជំងឺរាតត្បាតកូវីដ-១៩ ហើយបានជំរុញឲ្យកងកម្លាំងអន្តរជាតិ ដែលដឹកនាំដោយសហរដ្ឋអាមេរិក ល្បាតដែនទឹក នៅជិតប្រទេសយេម៉ែន។

ហើយការលើកឡើងរបស់លោក Miller នេះ បានសំដៅទៅលើនាវិកនៃនាវាពាណិជ្ជកម្ម Galaxy Leader ដែលត្រូវបានរឹបអូសដោយក្រុមហ៊ូធីរបស់យេម៉ែន ដែលគាំទ្រដោយអ៊ីរ៉ង់ កាលពីខែមុន ដោយនាវាផ្ទុករថយន្ត ដែលមានទង់ជាតិបាហាម៉ា ត្រូវបាននាំយកទៅកាន់កំពង់ផែ Hodeidah នៅភាគខាងជើងនៃប្រទេសយេម៉ែន ដែលគ្រប់គ្រងដោយក្រុមហ៊ូធី៕