ក្រុមមន្ត្រីអង្គការសហប្រជាជាតិ កាលពីថ្ងៃអង្គារ (១៩ ធ្នូ) បានសម្តែងការខឹងសម្បារ និងភាពមិនគួរឲ្យជឿអំពីស្ថានភាពនៅក្នុងមន្ទីរពេទ្យនានាក្នុងតំបន់ហ្កាហ្សា ជាទីដែលអ្នករងរបួសមិនមានការផ្គត់ផ្គង់មូលដ្ឋាន ហើយកុមារដែលជាសះស្បើយពីការបាត់បង់អវៈយវៈ ត្រូវបានសម្លាប់នៅក្នុងជម្លោះដែលកំពុងបន្ត។

អង្គការសុខភាពពិភពលោកបាននិយាយថា ជិតបីភាគបួននៃមន្ទីរពេទ្យនៅតំបន់ហ្កាហ្សា ឬមន្ទីរពេទ្យចំនួន ២៧ទីតាំង ក្នុងចំណោមមន្ទីរពេទ្យចំនួន ៣៦ទីតាំង លែងដំណើរការដោយសារតែការខូចខាតក្នុងការវាយប្រហារ ការវាយឆ្មក់របស់អ៊ីស្រាអែល ព្រមទាំងកង្វះប្រេងឥន្ធនៈ និងបុគ្គលិក។ មន្ទីរពេទ្យដែលនៅតែបើកគឺដំណើរការត្រឹមតែមួយផ្នែកប៉ុណ្ណោះ និងស្ថិតក្រោមសម្ពាធដែលកំពុងកើនឡើងដោយសារតែការវាយប្រហារ និងកំណើនដ៏ច្រើនសន្ធឹកសន្ធាប់នៃចំនួនអ្នកជំងឺ និងអ្នករបួសដែលមកដល់។

លោក ជេមស៍ អ៊ែលឌឺ (James Elder) អ្នកនាំពាក្យទីភ្នាក់ងារកុមាររបស់អង្គការសហប្រជាជាតិបាននិយាយថា៖ «ខ្ញុំខឹងខ្លាំងណាស់ ដែលកុមារដែលកំពុងតែជាសះស្បើយពីការបាត់បង់អវៈយវៈ ត្រូវបានសម្លាប់នៅក្នុងមន្ទីរពេទ្យទាំងនោះ។ លោកបានបន្ថែមថា មន្ទីរពេទ្យ ណាសសឺ (Nasser) ដែលជាមន្ទីរពេទ្យប្រតិបត្តិការដ៏ធំបំផុតនៅក្នុងតំបន់ហ៊ុមព័ទ្ធនេះ ត្រូវបានបាញ់ផ្លោងពីរដងក្នុងរយៈពេល ៤៨ម៉ោងកន្លងមក។

លោកស្រី ម៉ាហ្ការ៉េត ហារីស (Margaret Harris) អ្នកនាំពាក្យអង្គការសុខភាពពិភពលោកបានពណ៌នាស្ថានភាពធ្ងន់ធ្ងរក្នុងមន្ទីរពេទ្យហ្កាហ្សា ថាជារឿងនឹកស្មានមិនដល់។ លោកស្រីបានបន្ថែមថាមានតែប្រហែល ៣០% ប៉ុណ្ណោះនៃបុគ្គលិកសុខាភិបាលចំនួន ២០.០០០នាក់ ដែលប្រតិបត្តិការមុនជម្លោះ កំពុងធ្វើការក្នុងតំបន់ហ្កាហ្សាឥឡូវនេះ ដោយសារតែការស្លាប់ របួស និងការឃុំឃាំង៕