រដ្ឋាភិបាលរបស់លោកទ្រូដូ (Trudeau) នៅតែមិននិយាយថាតើខ្លួនកំពុងពិចារណាដាក់ទណ្ឌកម្មលើអ្នកតាំងទីលំនៅអ៊ីស្រាអែលដែលបង្កអំពើហិង្សាឬយ៉ាងណា បន្ទាប់ពីមានការហាមឃាត់ការធ្វើដំណើរដែលបានប្រកាសដោយទាំងសហរដ្ឋអាមេរិក និងចក្រភពអង់គ្លេស ក្នុងរយៈពេលប៉ុន្មានថ្ងៃថ្មីៗនេះ។

ប្រធានគោលនយោបាយការបរទេសរបស់សហភាពអឺរ៉ុបលោក ចូសិប បូរ៉ែល (Josep Borrell) បាននិយាយកាលពីសប្តាហ៍មុនថា លោកនឹងផ្តល់អនុសាសន៍អំពីទណ្ឌកម្មរបស់សហភាពអឺរ៉ុបផងដែរ។

ប្រទេសកាណាដា ដូចជាសម្ព័ន្ធមិត្តអាមេរិក អង់គ្លេស និងអឺរ៉ុប បានអំពាវនាវឲ្យអ៊ីស្រាអែល ទប់ស្កាត់អ្នកតាំងទីលំនៅជនជាតិជ្វីហ្វជ្រុលនិយម ដែលបាននាំមកនូវកម្រិតថ្មីនៃការភ័យខ្លាច និងអំពើហិង្សាថ្មីដល់តំបន់វេសបែង ក្រោមរដ្ឋាភិបាលចាស់របស់នាយករដ្ឋមន្ត្រីអ៊ីស្រាអែល លោកបេនចាមីន ណេតាន់យ៉ាហ៊ូ (Benjamin Netanyahu)។

គណៈរដ្ឋមន្ត្រីរបស់លោកណេតាន់យ៉ាហ៊ូ រួមបញ្ចូលទាំងមេដឹកនាំអ្នកតាំងទីលំនៅជ្រុលនិយមបំផុតរបស់អ៊ីស្រាអែលមួយចំនួន នៅក្នុងតំណែងសំខាន់ៗរបស់ខ្លួន។

កាលពីថ្ងៃសុក្រ ប្រទេសកាណាដា បានចុះហត្ថលេខាលើសេចក្តីថ្លែងការណ៍រួមសហភាពអឺរ៉ុប-ចក្រភពអង់គ្លេស-អូស្ត្រាលី ដោយនិយាយថា ការបរាជ័យរបស់អ៊ីស្រាអែលក្នុងការទប់ស្កាត់ ឬកាត់ទោសក្រុម ជ្រុលនិយមជ្វីហ្វ បានបង្កើត «បរិយាកាសនៃនិទណ្ឌភាពស្ទើរតែពេញលេញ» សម្រាប់អ្នកតាំងទីលំនៅ ដែលចូលរួមក្នុងអំពើហិង្សា។