សេវាកម្មជីវិតសត្វព្រៃ និងរុក្ខាជាតិ(SERFOR) បាននិយាយថា ក្រុមអាជ្ញាធរប៉េរូ បានរឹបអូសអណ្តើករស់ចំនួន ៤ពាន់ក្បាលដែលប្រុងលោតឆ័ត្រទៅកាន់ប្រទេសឥណ្ឌូនេស៊ី ក្រោយរកឃើញភាពមិនប្រក្រតីនៅក្នុងឯកសារដឹកជញ្ជូនកាលពីថ្ងៃសុក្រ ។

នៅក្នុងចំណោមអណ្តើករាប់ពាន់ក្បាលដែលរឹបអូសបាននៅក្នុងអាកាសយានដ្ឋានអន្តរជាតិក្រុង Jorge Chavez ក្រុមអាជ្ញាធរ SERFOR បានរកឃើញពូជអណ្តើក Charapa ចំនួន ៤៦៣ក្បាល ដែលប្រភពដើមស្របច្បាប់របស់វាមិនអាចបញ្ជាក់បាននោះទេ ។

លើសពីនេះទៀត វាត្រូវបានគេកំណត់ថា អាយុដែលបានបង្ហាញនៅលើលិខិតអនុញ្ញាតចេញសម្រាប់អណ្តើក គឺខុសពីអាយុប៉ាន់ស្មានអណ្តើកដែលបានត្រួតពិនិត្យ ។

បន្ទាប់ពីការរឹបអូសអណ្តើកធ្វើឡើងដោយក្រុមអាជ្ញាធរ SERFOR ដោយសម្របសម្រួលជាមួយអគ្គនាយកដ្ឋានគយ និងរដ្ឋាករជាតិប៉េរូ សត្វអណ្តើកទាំងអស់នេះ ត្រូវបានប្រគល់ជូនឲ្យរក្សាទុកបណ្តោះអាសន្ននៅមជ្ឈមណ្ឌលបង្កាត់ពូជអណ្តើកស្ថិតក្នុងទីក្រុង Lima ៕