​រុស្ស៊ី៖ ប្រជា​ពលរដ្ឋ​រុស្ស៊ី​បាន​បង្ហាញ​ទស្សនៈ​ផ្សេងៗ​គ្នា ​ចំពោះ​ជំនួប​កំពូល​រវាង​លោក​ប្រធានាធិបតីរុស្ស៊ី Vladimir Putin និង​សម​ភាគី​អាមេរិក​របស់​លោក​គឺ​លោក Joe Biden កាល​ពី​ថ្ងៃ​ពុធ ដោយ​អ្នកខ្លះ​និយាយ​ថា ​មាន​ភាព​រីកចម្រើន​តិចតួច ប៉ុន្តែ​អ្នកខ្លះ​ទៀត​បាន​លើក​ឡើង​ថា ​ជំហាន​ទាំងនោះ​បាន​កំពុង​ដើរ​លើ​ទិសដៅ​ត្រឹមត្រូវ​។

​លោក Biden និង​លោក Putin បាន​ឈាន​ដល់​កិច្ចពិភាក្សា​ទល់មុខ​គ្នា​កាលពី​ថ្ងៃ​ពុធ ​នៅ​ឯ​វិមាន​មាត់បឹង​ដ៏​ប្រណីតជា​ជំនួប​កំពូល​ដែល​គេ​ទន្ទឹង​រង់​ចាំ ​នៅ​ពេល​ដែល​មេដឹកនាំ​ទាំងពីរ​និយាយ​ថា ​ទំនាក់ទំនង​រវាង​ប្រទេស​របស់​ខ្លួន​ស្ថិតនៅ​ចំណុច​ទាប​។​ មន្ត្រី​ផ្នែក​ហិរញ្ញវត្ថុ​លោក Vayyur Dareyev បាន​ប្រាប់​សារព័ត៌មាន AP ថា លោក​គិត​ថា តាម​ពិត​ទៅដូចជា​ពុំបាន​ទទួល​លទ្ធផល​ជា​ផ្លែផ្កា​អ្វី​ទេ វា​គឺជា​ការងារ​នយោបាយ។ លោក​បាន​បន្ថែម​ថា លោក​សង្ឃឹមថា​ចំណុច​រួម​នានា​នឹង​ត្រូវ​រក​ឃើញ ប៉ុន្តែ​និយាយ​ឲ្យ​ត្រង់​ទៅវា​គ្មាន​ភាព​ច្បាស់​លាស់​ទេ​។

​ចំណែក​អ្នកធ្វើការ​ជា​អ្នកបកប្រែ​គឺ​លោក Yekaterina Mozgovaya បាន​និយាយ​ថា លោក​គិត​ថា អ្វីមួយ​នឹង​មិន​អាច​ផ្លាស់ប្ដូរ​ភ្លាមៗ​ទេ ​ទាំង​នៅ​ក្នុង​ប្រទេស​រុស្ស៊ី​ ឬ​សហរដ្ឋអាមេរិក​បន្ទាប់​ពី​ជំនួប​នោះ​។​ រីឯ​អ្នកស្រី Pavel Sharikov សាស្ត្រាចារ្យ​នៃ​វិទ្យាស្ថាន​សិក្សា​អាមេរិក ​និង​កាណា​ដា​នៃ​បណ្ឌិត្យសភា​វិទ្យាសាស្ត្រ​រុស្ស៊ី​បាន​លើក​ឡើង​ថា ​ការចរចា​ដែល​ត្រូវ​បាន​ចាប់ផ្ដើម​លើ​ប្រធានបទ​ផ្សេងៗ​គ្នា​ គឺជា​សញ្ញា​ល្អ​សម្រាប់​ប្រទេស​ទាំងពីរ​៕

អត្ថបទ៖ សុខមាន