ក្រសួងកងកម្លាំងប្រដាប់អាវុធបារាំង បាននិយាយនៅក្នុងសេចក្តីថ្លែងការណ៍មួយ កាលពីថ្ងៃទី១៩ ខែធ្នូថា អ្នកបើកយន្តហោះយោធាអ៊ុយក្រែន ត្រូវបានគេរំពឹងថា នឹងចាប់ផ្តើមហ្វឹកហាត់ នៅប្រទេសបារាំង នៅឆ្នាំក្រោយដែលជាផ្នែកមួយនៃជំនួយយោធារបស់ប្រទេសនេះ ដល់ទីក្រុងគីវ។

សេវាសារព័ត៌មានរបស់ក្រសួង បានរំលឹកថា ប្រធានាធិបតីបារាំងលោក អេម៉ានូអែល ម៉ាក្រុង (Emmanuel Macron) កាលពីថ្ងៃទី១៥ ខែឧសភា បានផ្តល់ឱកាសដល់អ៊ុយក្រែន ក្នុងការបណ្តុះបណ្តាលអ្នកបើកយន្តហោះចម្បាំងជាមួយដៃគូអឺរ៉ុប។

យោងតាមសេចក្តីថ្លែងការណ៍ បានឲ្យដឹងថា អ្នកបើកយន្តហោះអ៊ុយក្រែនមួយក្រុម នឹងមកដល់ដើមឆ្នាំ ២០២៤ សម្រាប់ការហ្វឹកហ្វឺនដំបូង នៅក្នុងប្រទេសបារាំង មុនពេលបន្តការហ្វឹកហាត់បើកយន្តហោះចម្បាំង ក្រោមការត្រួតពិនិត្យរបស់ប្រទេសដៃគូ។

ក្រសួងការពារជាតិអ៊ុយក្រែន បាននិយាយកាលពីថ្ងៃទី ៣០ ខែវិច្ឆិកាថា ប្រទេសបារាំង បានសន្យាបន្តការគាំទ្រផ្នែកយោធាដល់អ៊ុយក្រែន រហូតដល់ឆ្នាំ ២០២៤ និងបង្កើនការផ្គត់ផ្គង់គ្រាប់រំសេវ។

កាលពីថ្ងៃទី ១០ ខែធ្នូ ប្រធានាធិបតីអ៊ុយក្រែនលោក វ៉ូឡូមៀ ហ្សេឡិនស្គី (Volodymyr Zelenskyy) ពេលកំពុងបំពេញទស្សនកិច្ច នៅប្រទេសអាហ្សង់ទីន បានសន្ទនាតាមទូរស័ព្ទជាមួយលោកម៉ាក្រុង។