ប្រជាជនអ៊ុយក្រែនកំពុងត្រៀមខ្លួនប្រារព្ធបុណ្យណូអែលដំបូងរបស់ខ្លួន តាមប្រតិទិនថ្មី ដែលជាជំហានមួយទៀត ឆ្ពោះទៅរកការលុបបំបាត់ដានទាំងអស់នៃឥទ្ធិពលរបស់រុស្ស៊ី ខណៈដែលយោធារបស់ពួកគេប្រឹងប្រយុទ្ធទប់ទល់នឹងការលុកលុយរបស់វិមានក្រឹមឡាំង។

ប្រជាជនអ៊ុយក្រែនភាគច្រើនជាគ្រិស្តសាសនិកនិកាយ Orthodox (អូស្សូដក់) ហើយព្រះវិហារដ៏ធំរបស់ប្រទេស នៅឆ្នាំនេះ បានយល់ព្រមផ្លាស់ប្ដូរលែងធ្វើតាមប្រតិទិនប្រពៃណី Julian ដែលត្រូវបានប្រើនៅក្នុងប្រទេសរុស្ស៊ី និងយល់ព្រមប្រារព្ធពិធីបុណ្យ នៅថ្ងៃទី៧ ខែមករា។

ការវាយប្រហារ ក្នុងខែកុម្ភៈ ឆ្នាំ២០២២ ដែលធ្វើឡើងដោយទីក្រុងមូស្គូ បានធ្វើឲ្យប្រជាជាតិវេញគ្នាជាធ្លុងមួយ ដើម្បីការពារជាតិ ហើយបានជំរុញឲ្យប្រជាជនអ៊ុយក្រែនជាច្រើនឈប់ប្រើប្រាស់ភាសា និងវប្បធម៌រុស្ស៊ី រួមទាំងទំនាក់ទំនងប្រវត្តិសាស្ត្រផ្សេងទៀតរបស់អតីតអ្នកគ្រប់គ្រងទីក្រុងគីវ។

លោក Mykhailo Omelian ដែលជាបព្វជិតនិកាយអូស្សូដក់នៅទីក្រុងគីវ បាននិយាយថា៖ «អ្វីៗគ្រប់យ៉ាង ដែលទាក់ទងនឹងរុស្ស៊ី និងអ្វីៗគ្រប់យ៉ាងដែលរុស្ស៊ីធ្វើដូចគ្នានឹងយើងបានធ្វើ បង្កឲ្យមានការស្អប់ខ្ពើមក្នុងចំណោមប្រជាជន»។

ជាមួយគ្នានេះ អ៊ុយក្រែនក៏បានបង្ហាញពីចំណាប់អារម្មណ៍ ក្នុងការចូលរួមជាមួយសហភាពអឺរ៉ុប ហើយមនុស្សជាច្រើននៅទីនេះ មើលឃើញថា សមាជិកភាពជាការបញ្ជាក់អះអាងដ៏សំខាន់នៃអ្វី ដែលពួកគេជឿថា ជាពេលវេលាប្រវត្តិសាស្ត្ររបស់ប្រទេសពួកគេ នៅទ្វីបអឺរ៉ុប។

នៅក្បែរខ្សែត្រៀមជួរមុខនៃការលុកលុយរបស់រុស្ស៊ី ដែលជិតគ្រប់រយៈពេល ២ឆ្នាំ ហើយនិងមិនមានសញ្ញាធូរស្រាលនោះ ពួកទាហានក៏កំពុងរៀបចំការផ្លាស់ប្តូរទៅប្រាពរព្ធពិធីបុណ្យនេះ នៅថ្ងៃទី២៥ ខែធ្នូ ដូចប្រទេសអឺរ៉ុបផ្សេងទៀត។ លើសពីនេះទៀត អាជ្ញាធរអ៊ុយក្រែនក៏បានបង្កើនយុទ្ធនាការ ដើម្បីប្តូរឈ្មោះផ្លូវ និងការតាំងទីលំនៅនានា ក៏ដូចជាការកម្ទេចចោលរូបសំណាក និងវិមានរំលឹកអនុស្សាវរីយ៍ ដែលភ្ជាប់ទៅនឹងប្រព័ន្ធ និងអតីកាលរបស់សហភាពសូវៀត៕