វិមានក្រឹមឡាំង នៅថ្ងៃពុធ (ទី២០ ខែធ្នូ) នេះ បាននិយាយថា មិនមានមូលដ្ឋានបច្ចុប្បន្ន សម្រាប់កិច្ចចរចាសន្តិភាព រវាងរុស្ស៊ី និងអ៊ុយក្រែននោះទេ ហើយថា ផែនការសន្តិភាព ដែលបានស្នើឡើងដោយទីក្រុងគីវ គឺមិនអាចទទួលយកបានឡើយ ព្រោះមិនបានរាប់បញ្ចូលរុស្ស៊ី។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា៖ «យើងពិតជាចាត់ទុកថា ប្រធានបទនៃការចរចា មិនពាក់ព័ន្ធនោះទេ នៅពេលនេះ»។ ជាមួយគ្នានេះ លោក Peskov បាននិយាយថា ចក្រភពអង់គ្លេស បានទម្លាក់ចោលឱកាស ដែលនាំមានកិច្ចព្រមព្រៀងសន្តិភាព នៅឆ្នាំ២០២២ ដោយការដាក់សម្ពាធលើទីក្រុងគីវឲ្យបដិសេធសេចក្តីព្រាងកិច្ចព្រមព្រៀងភ្លាមៗ បន្ទាប់ពីរុស្ស៊ីបានបញ្ជូនកងទ័ពចូលទៅអ៊ុយក្រែន។

លោក Peskov បាននិយាយថា៖ «បន្ទាប់ពីនោះមក មិនមានតម្រូវការចាំបាច់ ដើម្បីឲ្យមានការចរចាទេ ហើយមានតម្រូវការចាំបាច់កាន់តែតិចជាងមុន បន្ទាប់ពីអ៊ុយក្រែន ដោយជាក់ស្ដែង បានរារាំងនូវរាល់ការចរចាណាមួយជាមួយភាគីរុស្ស៊ី ដោយស្របច្បាប់»។

សូមបញ្ជាក់ថា ប្រធានាធិបតីអ៊ុយក្រែនលោក Volodymyr Zelenskiy បានចុះហត្ថលេខាលើក្រឹត្យមួយកាលពីខែតុលា ឆ្នាំ២០២២ ដោយប្រកាសជាផ្លូវការនូវលទ្ធភាពនៃកិច្ចចរចាអ៊ុយក្រែនណាមួយជាមួយលោក វ្ល៉ាឌីមៀរ ពូទីន គឺ «មិនអាចទៅរួច» នោះទេ បន្ទាប់ពីរុស្ស៊ីបានអះអាងថា បានបញ្ចូលជាឧបសម្ព័ន្ធនូវតំបន់ចំនួនបួននៃភាគខាងត្បូង និងខាងកើតអ៊ុយក្រែន។

លោក Peskov បាននិយាយថា ផែនការសន្តិភាពរបស់លោក Zelenskiy ដែលគេស្គាល់ថា ជា «រូបមន្តសន្តិភាព» របស់លោកនោះ គឺជាកំហុសឆ្គង ដោយសារលោកបាននិយាយថា ខ្លួនព្យាយាមស្វែងរកសន្តិភាព ដោយគ្មានការចូលរួមពីរុស្ស៊ី៕