មន្ត្រីជាច្រើនរូប នៅថ្ងៃពុធ (ទី២០ ខែធ្នូ) នេះ បានឲ្យដឹងថា មានបេក្ខជនចំនួន ១៦នាក់នាក់ហើយ ដែលបានដាក់ពាក្យឈរឈ្មោះប្រជែងតំណែងប្រធានាធិបតីរុស្ស៊ី ឆ្នាំ២០២៤ នៅក្នុងការបោះឆ្នោតមួយដែលគេរំពឹងថា នឹងផ្ដល់អាណត្តិទី៥ ទៅឲ្យលោក Vladimir Putin យ៉ាងស្រួលៗ។

រដ្ឋាភិបាលក្រុងមូស្គូ បានរារាំងអស់ជាច្រើនឆ្នាំមកហើយចំពោះឥស្សរជនគណបក្សប្រឆាំងពីការបោះឆ្នោត និងជីវិតនយោបាយ ជាការគៀបសង្កត់ ដែលបានកើនឡើងបន្ទាប់ពីវិមានក្រឹមឡាំង បានបញ្ជាឲ្យកងទ័ពរុស្ស៊ីចូលលុកលុយអ៊ុយក្រែន ក្នុងឆ្នាំ២០២២។

ខណៈត្រូវបានដកស្រង់សម្តីដោយទីភ្នាក់ងារសារព័ត៌មាន RIA Novosti ដែលគ្រប់គ្រងដោយរដ្ឋ ប្រធានគណៈកម្មាធិការរៀបចំការបោះឆ្នោតមជ្ឈិម (CEC) លោក Ella Pamfilova បាននិយាយថា៖ «រហូតមកដល់ពេលនេះ យើងបានទទួលពាក្យសុំពីបេក្ខជនចំនួន ១៦នាក់ហើយ សម្រាប់ការបោះឆ្នោតជ្រើសរើសប្រធានាធិបតី»។

លោក Putin បានបញ្ជាក់ក្នុងខែនេះក្នុងអំឡុងពេលជួបជាមួយអតីតយុទ្ធជនយោធាថា លោកនឹងចូលរួមក្នុងការបោះឆ្នោត ដែលគ្រោងនឹងធ្វើឡើងនៅឆ្នាំ២០២៤ រយៈពេល ៣ថ្ងៃ ចាប់ពីថ្ងៃទី១៥ ខែមីនា។

ជាមួយគ្នានេះ CEC បានឲ្យដឹងថា ខ្លួននឹងរៀបចំផងដែរនូវការបោះឆ្នោត នៅក្នុងតំបន់ចំនួនបួនរបស់អ៊ុយក្រែន ដែលត្រូវបានកាន់កាប់ផ្នែកខ្លះដោយកងកម្លាំងរុស្ស៊ី និងនៅឧបទ្វីបគ្រីមៀ ដែលត្រូវបានបញ្ចូលជាឧបសម្ព័ន្ធពីទីក្រុងគៀវ ក្នុងឆ្នាំ២០១៤។

សម្រាប់ការចុះឈ្មោះប្រជែងតំណែងប្រធនាធិបតីនេះ បេក្ខជនត្រូវតែដាក់ពាក្យសុំឈរឈ្មោះឲ្យបានត្រឹមថ្ងៃទី២៧ ខែធ្នូ ហើយច្បាប់បោះឆ្នោតចែងថា បន្ទាប់មកពួកគេនឹងត្រូវតម្រូវឲ្យប្រមូលហត្ថលេខាអ្នកគាំទ្ររាប់ពាន់ ដើម្បីទទួលបានការមានឈ្មោះនៅលើសន្លឹកឆ្នោត៕