ចំនួនអ្នកស្លាប់របស់ប៉ាឡេស្ទីន ពីការវាយប្រហាររបស់អ៊ីស្រាអែល នៅតំបន់ហ្កាហ្សាស្ទ្រីប ចាប់​តាំង​ពីថ្ងៃ​ទី០៧ ខែតុលា មកបានកើនឡើងដល់ ២០.០០០នាក់ហើយ នេះបើយោង​តាម​សេច​ក្តីថ្លែ​ង​ការណ៍ដែលចេញផ្សាយដោយការិយាល័យប្រព័ន្ធផ្សព្វផ្សាយរដ្ឋាភិបាល ដែលគ្រប់​គ្រង​ដោយ​ក្រុម​ហាម៉ាស កាលពីថ្ងៃពុធ (២០ ធ្នូ)។

សេចក្តីថ្លែងការណ៍នោះបាននិយាយថា ជនរងគ្រោះរួមមានកុមារប្រហែល ៨.០០០នាក់ និងស្ត្រី ៦.២០០​នាក់ ខណៈដែលមនុស្សជាង ៥២.០០០នាក់ បានរងរបួស និងមនុស្ស ៦.៧០០នាក់ ផ្សេង​ទៀត​កំពុងបាត់ខ្លួន។ បុគ្គលិកពេទ្យសរុបចំនួន ៣១០នាក់ បុគ្គលិកការពារជនស៊ីវិល ៣៥នាក់ និងអ្នកសារព័ត៌មាន ៩៧នាក់ ត្រូវបានសម្លាប់នៅក្នុងការវាយប្រហាររបស់អ៊ីស្រាអែល។

ជាមួយគ្នានេះដែរ ក្រសួងសុខាភិបាលប៉ាឡេស្ទីនបាននិយាយកាលពីថ្ងៃពុធ ថាជន​ជាតិ​ប៉ាឡេស្ទីន ពីរនាក់ត្រូវបានសម្លាប់ក្នុងការប៉ះទង្គិចជាមួយទាហានអ៊ីស្រាអែល នៅក្នុងទីក្រុង ហេប្រុន (Hebron) និងទីក្រុង បែតឡេហែម (Bethlehem) របស់តំបន់វេស បែង។

យោង​តាមសារព័ត៌មាន WAFA ដែលជាទីភ្នាក់ងារព័ត៌មានផ្លូវការរបស់ប៉ាឡេស្ទីន បានឲ្យដឹងថា ចំនួននោះ​បានបង្កើនតួលេខអ្នកស្លាប់របស់ប៉ាឡេស្ទីន ពីការបាញ់កាំភ្លើងរបស់អ៊ីស្រាអែល នៅ​ក្នុង​ទឹក​ដីកាន់កាប់មួយនេះ ដល់ចំនួន ៣០៣នាក់ ចាប់តាំងពីជម្លោះអ៊ីស្រាអែល និង​ប៉ាឡេស្ទីន​ជុំថ្មី​នេះបានផ្ទុះឡើងកាលពីថ្ងៃទី០៧ ខែតុលា មក៕