មេដឹកនាំកូរ៉េខាងជើង លោក គីម ជុងអ៊ុន បាននិយាយថា ទីក្រុងព្យុងយ៉ាង នឹង​មិន​ស្ទាក់​ស្ទើរ​ក្នុង​ការ​វាយប្រហារនុយក្លេអ៊ែរនោះទេ ប្រសិនបើសត្រូវបង្ករឿងដោយអាវុធនុយក្លេអ៊ែរ នេះ​បើ​យោង​តាម​ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃព្រហស្បតិ៍ (២១ ធ្នូ) នេះ។

ទីភ្នាក់ងារសារព័ត៌មាន KCNA បាននិយាយថា លោក គីម បានធ្វើការលើកឡើងនេះ ខណៈ​ដែល​លោក​បាន​ជួបជាមួយក្រុមទាហាននៅក្រោមការិយាល័យមីស៊ីលរបស់យោធា ជុំវិញ​សម​យុទ្ធ​បាញ់​បង្ហោះ​មីស៊ីល​ផ្លោងអន្តរទ្វីប (ICBM) នាពេលថ្មីៗនេះ។

កូរ៉េខាងជើង បាននិយាយកាលពីថ្ងៃអង្គារ ថាខ្លួនបានសាកល្បងមីស៊ីល ICBM ថ្មីបំផុតរប​ស់​ខ្លួន​កាល​ពី​ថ្ងៃច័ន្ទ ដើម្បីវាស់​ស្ទង់​ការ​ត្រៀម​ខ្លួន​ធ្វើ​សង្គ្រាម​នៃ​កម្លាំង​នុយ​ក្លេអ៊ែរ​របស់​ខ្លួន​ប្រឆាំង​នឹង​ការ​បង្កើន​អរិភាពរបស់សហរដ្ឋអាមេរិក ដោយទាញការថ្កោលទោសពីសហរដ្ឋអាមេរិក និង​សម្ព័ន្ធ​មិត្ត​របស់​ខ្លួន។

ទីភ្នាក់ងារសារព័ត៌មាន KCNA បានរាយការណ៍ថា ការបាញ់​បង្ហោះ​កាល​ពី​ថ្ងៃ​ច័ន្ទ​នេះ​បាន​បង្ហាញ​ពី​ភា​ពចល័តខ្ពស់ និងសមត្ថភាពវាយប្រហាររហ័សរបស់យោធា ហើយ​បាន​អំពាវ​នាវ​ឱ្យ​មាន​ការ​ខិតខំ​ប្រឹងប្រែងដើម្បីពង្រឹងប្រសិទ្ធភាពប្រយុទ្ធរបស់ខ្លួនបន្ថែមទៀត។

នៅក្នុងសេចក្តីថ្លែងការណ៍ដាច់ដោយឡែកមួយ ប្អូនស្រីរបស់មេដឹកនាំកូរ៉េខាងជើង គឺលោកស្រី គីម យូជុង (Kim Yo Jong) បានថ្កោលទោសក្រុមប្រឹក្សាសន្តិសុខអង្គការសហប្រជាជាតិ (UNSC) ដែលបានបើកកិច្ចប្រជុំជុំវិញការបាញ់បង្ហោះមីស៊ីលផ្លោងអន្តរទ្វីប ICBM នេះ​ដោយ​និយាយ​ថា ការបាញ់បង្ហោះនោះគឺជាការអនុវត្តសិទ្ធិស្វ័យការពាររបស់ប្រទេសប៉ុណ្ណោះ៕