ក្នុងឱកាសអញ្ជើញជាអធិបតីភាពក្នុងពិធីបិទសន្និបាតបូកសរុប លទ្ធផលការងារប្រចាំឆ្នាំ២០២៣ និង​លើកទិសដៅការងារឆ្នាំ២០២៤ របស់រដ្ឋបាលខេត្តពោធិ៍សាត់ នារសៀលថ្ងៃទី២០ ខែធ្នូ ឆ្នាំ​២០២៣ ឯកឧត្តម កែវ រតនៈ រដ្ឋមន្ត្រីក្រសួងរ៉ែនិងថាមពល និង​ជា​ប្រធាន​ក្រុម​ការងារ​រាជ​រដ្ឋាភិបាល​ចុះជួ​យ​ខេត្តពោធិ៍សាត់ បានមានប្រសាសន៍លើកឡើងថា ក្នុងអាណត្តិទី៧ ពី​ឆ្នាំ​២០២៣ ដល់ឆ្នាំ២០២៨ រាជរដ្ឋាភិបាលកម្ពុជា ដែលដឹកនាំដោយសម្តេចមហាបវរធិបតី ហ៊ុន ម៉ាណែត បាននឹងកំពុងផ្តោតយកចិត្តទុកដាក់ខ្លាំងលើការងារបង្កើនចំណូលអោយប្រជាពលរដ្ឋ និង​ការរុញកំណើនសេដ្ឋកិច្ច តាមគ្រប់រូបភាព អោយទៅដល់ប្រជាពលរដ្ឋប្រកបដោយសមធម៌ តាមរយៈ​ការបន្តពង្រឹង​សន្តិភាព និងធនធានមូលដ្ឋាន ដែលបានបន្សល់ទុកពីសម្តេចតេជោ ហ៊ុន សែន។

ចំពោះខេត្តពោធិ៍សាត់ គឺបានដាក់គោដៅដូចគ្នា ដោយគ្រប់ភាគីពាក់ព័ន្ធត្រូវរួមគ្នា ដើម្បី​បង្កើន​ចំណូល​អោយ​ប្រជាពលរដ្ឋ តាមរយៈការទាក់ទាញវិនិយោគទាំងក្នុងខេត្ត និងក្រៅខេត្ត រួម​និង​ការ​បង្កើនចំណូលតាមរយៈសកម្មភាពផ្សេងៗដូចជា កសិកម្ម សេវាកម្ម វិស័យការងារ ទេសចរណ៍​ជាដើម ដូចនេះឯកឧត្តម បានដាក់ផែនការអោយក្រុង-ស្រុកទាំង៧ ក្នុង​ខេត្ត​ពោធិ៍សាត់ ត្រូវធ្វើការប្រឡងប្រណាំងគ្នាក្នុងន័យវិជ្ជមាន ដើម្បីទាក់ទាញការវិនិយោគ ឬ​អាជីវកម្ម​ផ្សេង​ៗ​ចូល​មូលដ្ឋានរបស់ខ្លួន ដោយឯកឧត្តមបានសង្កត់ធ្ងន់ថា អាជ្ញាធរ គ្រប់មូលដ្ឋាន​មិន​ត្រូវ​ធ្វើ​ការ​គាប់​សង្កត់ជំរិតយកលុយក្រោមតុ ហើយត្រូវធ្វើការគ្រាំទ្រជាដាច់ខាត គ្រប់អាជីវកម្មខ្នាតតូច មធ្បម និងធំ ព្រោះអាជ្ញាធរដែលល្អ គឺផ្តល់ការការពារ ផ្តល់ការគ្រាំទ្រ។ ហើយក្នុងនាម ឯកឧត្តម ជា​ប្រធានក្រុមការងាររាជរដ្ឋាភិបាលចុះជួយខេត្តពោធិ៍សាត់ ឯកឧត្តម នឹងសម្រប់សម្រួល ក្រុម​ការងារ​ថ្នាក់​ជាតិលើគ្រប់វិស័យ ជាមួយនិងថ្នាក់ក្រោមជាតិ អោយកាន់តែនៅក្បែរគ្នា អោយយល់​ច្បាស់​ពី​តម្រូវ​ការជាក់ស្តែងនៅមូលដ្ឋាន ដោយសម្រួល​ការងារ​រដ្ឋបាល​អោយ​កាន់​តែ​មាន​ភាព​ងាយ​ស្រួលមិ​នស្មុគស្មាញ់ បន្ថយការិយាល័យធិបតេយ្យ បង្កើនល្បឿននិងប្រសិទ្ធភាពការងារ ផ្តល់​ការ​គ្រាំទ្របន្ថែម ដើម្បីបង្កើតផ្លែផ្កាដល់ប្រជាពលរដ្ឋក្នុងមូលដ្ឋានខេត្តពោធិ៍សាត់ សំដៅ​ទៅ​លើ​ការ​បង្កើនចំណូល បង្កើនអំពើយុត្តិធម៌ និងសមធម៌ក្នុងសង្គម។

សូមបញ្ជាក់ដែរថា សន្និបាតបូកសរុប លទ្ធផលការងារប្រចាំឆ្នាំ២០២៣ និង​លើក​ទិស​ដៅ​ការងារ​ឆ្នាំ​២០២៤ របស់រដ្ឋបាលខេត្តពោធិ៍សាត់ រៀបចំធ្វើឡើងពីថ្ងៃទី១៩ -២០ ខែធ្នូ ឆ្នាំ០២០២៣ អង្គ​សន្និបាត​រយៈពេល២ថ្ងៃនេះ

បានដំណើរការ​ទៅ​យ៉ាងរលូន និង​ទទួល​បាន​លទ្ធផល​គួ​ជាទី​មោទនៈ​។ អង្គ​សន្និបាត​ត្រូវ​បាន​សមាជិក សមាជិការបានធ្វើបទអន្តរាគមន៍ ពីសំណាក់ថ្នាក់ដឹកនាំមន្ទីរ អង្គភាព​ និង​អាជ្ញាធរ​មូលដ្ឋាន​ និង​ពិភាក្សា​ជា​៤ក្រុម​ដើម្បី​ផ្តល់​ធាតុ​ចូល​ទៅ​លើ​របាយការណ៍​ដែល​មាន​ប្រធាន​បទ​ចំនួន​៤​រួម​មាន ១- ការចុះបញ្ជីអត្រានុកូលដ្ឋានគ្រប់ប្រភេទជូនដល់ប្រជាពលរដ្ឋ ២-ការលើក​កម្ពស់​គុណ​ភាព និង​ប្រសិទ្ធិភាព ក្នុងការពង្រឹងសន្តិសុខសណ្តាប់ធ្នាប់និងសុវត្ថិភាពសង្គម ៣- ការ​ដោះ​ស្រាយ​ទំនាស់ដីធ្លី និងវិវាទក្រៅតុលាការនៅមូលដ្ឋាន និង៤- បង្ការ​ទប់​ស្កាត់​ និង​បង្ក្រាប​បទ​ល្មើស​ធន​ធាន​ធម្មជាតិ។ នូវរាល់បទ​អន្តរាគមន៍​ក៏​ដូច​កិច្ច​ពិភាក្សា​បាន​ផ្តោតសំខាន់​លទ្ធផល​ការងារ​លើ​បញ្ហា​ប្រឈម​ ដំណោះស្រាយ សំណូមពរជាគន្លឹះដើម្បីធានាមានប្រសិទ្ធិភាព បទពិសោធន៍ និង​ធាតុ​ចូល​រួមក្នុងការគ្រប់គ្រងដឹកនាំនិង អនុវត្តទិសដៅរបស់រដ្ឋបាលខេត្តសម្រាប់ឆ្នាំ២០២៤៕ អត្ថបទ៖ ភិរុណ ពៅ