ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល ស្នើសាកលវិទ្យាល័យសាធារណៈ និងឯកជន និងគ្រប់គ្រឹះស្ថាន សូមយកចិត្តទុកដាក់បណ្តុះបណ្តាលដល់គម្រោងវិជ្ជាជីវៈផ្នែកវេជ្ជសាស្រ្ត ចេះធ្វើកិច្ចការដោយសហការគ្នាឲ្យបានល្អ និងសង្គតិភាពខ្ពស់។
ការថ្លែងរបស់ឯកឧត្តមសាស្រ្តាចារ្យ ឈាង រ៉ា យ៉ាងដូច្នេះក្នុងពិធីបើកសន្និសីទជាតិស្តីពី ការអប់រំសម្រាប់វិជ្ជាជីវៈសុខាភិបាល ឆ្នាំ២០២៣ រយៈពេល២ថ្ងៃ ចាប់ពីថ្ងៃទី២១-២២ ខែធ្នូ ឆ្នាំ២០២៣។
ឯកឧត្តម រដ្ឋមន្រី្ត បន្តថា យោងតាមការអនុវត្តយុទ្ធសាស្រ្តបញ្ចកោណរបស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបន្តវេណពីសំណាក់សម្តេចអគ្គមហាសេនាបតីតេជោ ហ៊ុន សែន ដើម្បីជម្រុញលើកទឹកចិត្ត និងយកចិត្តទុកដាក់យ៉ាងខ្លាំង ទៅលើសុខមាលភាពប្រជាជនកម្ពុជាទាំងមូល ដែលការអនុវត្តមូលធនមនុស្សត្រូវបានរាជរដ្ឋាភិបាលចាត់ទុកនៅក្នុងបញ្ចកោណទី១ ដោយបន្តផ្តោតលើការ ផ្តល់អាទិភាពនៅចំនួន៥ ដែលក្នុងនោះការពង្រឹងគុណភាពវិស័យអប់រំ កីឡា វិទ្យាសាស្រ្ត បច្ចេកទេស ដែលមានគោលដៅជាយុទ្ធសាស្រ្ត ផ្តោតទៅលើការបង្កើនបរិយាកាសល្អសម្រាប់ការអប់រំ និងការបណ្តុះបណ្តាលប្រកបដោយគុណភាព និងជំនាញខ្ពស់ តាមរយៈការពង្រឹងអភិបាលកិច្ចនៃការគ្រប់គ្រងនៅតាមគ្រឹះស្ថានសិក្សា ការពង្រឹង និងការបង្កើនគុណភាពនៃការបណ្តុះបណ្តាលគ្រប់កម្រិត និងការចូលរួមរៀននូវមុខវិទ្យា វិទ្យាសាស្រ្ត បច្ចេកទេស វិស្វកម្ម សិល្បៈ និងគណិតវិទ្យា និងការអប់រំ កាយ និងកីឡា ផងដែរ។
ឯកឧត្តម សាស្រ្តាចារ្យ ឈាង រ៉ា បានបញ្ជាក់ថា ក្រសួងសុខាភិបាល ក៏បានផ្តល់អាទិភាពដល់ការអភិវឌ្ឍធនធានមនុស្ស ជាពិសេសការអប់រំ មុនពេលបម្រើការងារសម្រាប់វិជ្ជាជីវៈសុខាភិបាលផងដែរ។ ទន្ទឹមនឹងនោះសន្និសីទរយៈពេល២ថ្ងៃនេះ នឹងផ្តល់ឱកាសផ្លាស់ប្តូរបទពិសោធន៍ ពីការរកឃើញជាក់ស្តែង រួមទាំងការពិភាក្សា លើទ្រឹស្តី និងវិធីសាស្រ្តសម្រាប់ការវិភាគ តាមបែបនៃការអប់រំ ផ្តោតលើសមត្ថភាព ជាបច្ចេកទេស ក្រមសីលធម៌ និងវិជ្ជាជីវៈ នៅក្នុងការអប់រំវិជ្ជាជីវៈសុខាភិបាល នវានុវត្តន៍ និងការវិនិយោគ ការអប់រំ វិស័យសុខាភិបាល ព្រមទាំងស្វែងយល់ពីនិន្នាការ នៃការចម្រើន និងការអនុវត្តន៍ល្អបំផុត តែងតែលើកកម្ពស់គុណភាពនៃការអប់រំនៅក្នុងព្រះរាជាណាចក្រកម្ពុជា ឲ្យកាន់តែប្រសើរនាពេលខាងមុខ។ ដើម្បីបង្កើនធនធានមនុស្សក្នុងវិស័យសុខាភិបាល ប្រកបដោយសុវត្ថិភាព និងគុណភាពខ្ពស់ ព្រមទាំងធ្វើការជាក្រុម និងការបំពេញតាមស្តង់ដាជាតិ និងតំបន់ ក្នុងការបម្រើសេវាសុខភាពប្រកបដោយគុណភាព និងប្រសិទ្ធភាពខ្ពស់។
ជាចុងក្រោយឯកឧត្តម រដ្ឋមន្រី្ត សូមថ្លែងអំណរគុណដល់ដៃគូអភិវឌ្ឍនានា ជាពិសេសធនាគារពិភពលោក(World Bank) និង KFW ដែលបានជួយឧបត្ថម្ភ សហការយ៉ាងល្អជាមួយក្រសួងសុខាភិបាល ក្នុងការគាំទ្រគម្រោងពង្រឹងប្រព័ន្ធអប់រំសុខាភិបាល មុនពេលបម្រើការងារសម្រាប់មន្ត្រីសុខាភិបាល នាពេលកន្លងមក រហូតដល់បច្ចុប្បន្ន និងនាពេលអនាគត៕ អត្ថបទ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
