ភ្នំពេញ ៖ សមាគមក្រូចថ្លុងកោះទ្រង់ កំពុងទទួលបានការទាក់ទាញភ្ញៀវទេសជាតិ និងអន្តរជាតិ ដោយមានកំណើនកើនឡើងគួរកត់សម្គាល់ ក្រោយវិបត្តិជំងឺកូវីដ ១៩ នេះ សម្រាប់ការដើរកម្សាន្តតាមចម្ការ និងការទិញក្រូចបរិភោគជាដើម។

​លោកស្រី គាន រីណា ប្រធានសមាគមក្រូចថ្លុងកោះទ្រង់ក្រចេះ លើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV ស្តីពីការដាំដុះក្រូចថ្លុង និងការស្រូបយកភ្ញៀវទេសចរទស្សនាកម្សាន្ត ថា សមាគមក្រូចថ្លុងកោះទ្រង់មកដល់បច្ចុប្បន្ន មានសមា ជិកដែលជាអ្នកដាំដុះក្រូចថ្លុងចំនួន ១៥២ គ្រួសារ ដោយបានដាំដុះលើផ្ទៃដីជាង ៦០០ ហិចតា ក្នុងនោះក៏មានអាជីវករចំនួន ១០ គ្រួសារ បានប្រមូលទិញ និងលក់កសិផលក្រូចថ្លុងនេះ។

លោកស្រី បន្តឲ្យដឹងថា ជុំវិញការដាំដុះក្រូចថ្លុងនេះ បច្ចុប្បន្នសមាជិករបស់សមាគម បានដាំដុះនិងថែទាំយ៉ាងល្អប្រណិត ដោយគិតគូរបានខ្ពស់អំពីបញ្ហាបរិស្ថាន, មកដល់ពេលនេះ បន្ទាប់ពីជំងឺកូវីដ ១៩ បានធូស្រាល ឃើញថា សមាគមក្រូចថ្លុងកោះទ្រង់ ទទួលបានភ្ញៀវទេសចរជាតិ អន្តរជាតិ មានកំណើនគួរកត់សម្គាល់ សម្រាប់ការមកដើរកម្សាន្ត និងទស្សនាចម្ការក្រូច និងទិញផ្លែក្រូច ពិសារជាដើម ព្រោះក្រូចថ្លុងកោះទ្រង់ មានរស់ជាតិឆ្ងាញ់គ្មានពីរ បច្ចុប្បន្នក្រូចថ្លុងកោះទ្រង់ ក៏បាននាំចេញទៅកាន់ស្ទើគ្រប់ខេត្តទាំង អស់ នៅក្នុងព្រះរាជាណាចក្រកម្ពុជាផងដែរ។

លោកស្រី គាន រីណា ថ្លែងលើកឡើងបន្តថា ទាក់ទិនក្រូចថ្លុងកោះទ្រង់នេះ នៅពេលដល់ខែប្រមូលផល ឃើញថា សមាជិកសមាគម ទទួលបានទិន្នផលច្រើន ក្នុងនោះប្រសិនមានទីផ្សារនាំចេញទៅក្រៅប្រទេស វានឹងអាចជួយលើកកម្ពស់ដល់កសិករបន្ថែមដូចជា ធ្វើ ឲ្យកសិករពង្រីកផ្ទៃដីដាំដុះ ការទាក់ទាញភ្ញៀវទេសចរណ៍កាន់តែច្រើន ដើម្បីរួមចំណែកជាមួយរាជរដ្ឋាភិបាល និងការទទួលបាន ចំណូលកាន់តែច្រើន សម្រាប់ជីវភាពរស់នៅរបស់បងប្អូនលើកោះទ្រង់។

សូមបញ្ជាក់ថា ក្រូចថ្លុងកោះទ្រង់ក្នុងខេត្តក្រចេះ ត្រូវបានរាជរដ្ឋាភិបាលកម្ពុជា តាមរយៈក្រសួងពាណិជ្ជកម្ម បានសម្រេចដាក់បញ្ចូលជាផ្លូវការ នូវផលិតផលមួយនេះ ជាផលិតផលសម្គាល់ភូមិសាស្ត្រ (GI) នៅថ្ងៃទី ២៥ ខែមិថុនា ២០១៨ ៕ អត្ថបទ៖ សុន រ៉ាឌី