ប្រទេសចិន នៅថ្ងៃព្រហស្បតិ៍ (ទី២១ ខែធ្នូ) បាននិយាយថា ខ្លួនប្រឆាំងជាដាច់ខាតនូវអ្វី ដែលខ្លួនចាត់ទុកថា ជា «ការធ្វើបច្ចុប្បន្នភាពនៃការកែប្រែនូវការគាំពារនិយមរបស់អាមេរិក» ដោយការលើកឡើងនេះ ជាការឆ្លើយតបទៅនឹងរបាយការណ៍របស់សារព័ត៌មាន Wall Street Journal (WSJ) កាលពី ១ថ្ងៃមុន អំពីសហរដ្ឋអាមេរិក ដែលពិភាក្សាអំពីការដំឡើងពន្ធលើទំនិញចិនមួយចំនួន ក្នុងនោះរួមទាំងរថយន្តអគ្គិសនី (EV) ផងដែរ។

អ្នកនាំពាក្យក្រសួងការបរទេសចិន លោក Wang Wenbin បាននិយាយថា៖ «យើងជំរុញឲ្យសហរដ្ឋអាមេរិក គោរពតាមច្បាប់របស់អង្គការពាណិជ្ជកម្មពិភពលោក និងបន្តរក្សាការប្រកួតប្រជែងដោយយុត្តិធម៌ ដើម្បីផ្តល់នូវបរិយាកាសយុត្តិធម៌ មិនលម្អៀង និងមិនរើសអើង សម្រាប់ក្រុមហ៊ុនមកពីគ្រប់ប្រទេស»។

របាយការណ៍ WSJ កើតមានបន្ទាប់ពីមានសំណើមួយទៅកាន់រដ្ឋបាលពីសំណាក់សមាជិកសភានៃគណបក្សទាំង២ របស់សហរដ្ឋអាមេរិក កាលពីខែមុន ដោយស្នើឲ្យមានការដំឡើងពន្ធលើយានយន្ត ដែលផលិតដោយចិន និងស៊ើបអង្កេតវិធីនានា ដើម្បីការពារក្រុមហ៊ុនចិនកុំឲ្យនាំចេញទៅកាន់សហរដ្ឋអាមេរិកពីប្រទេសម៉ិកស៊ិក។

សូមបញ្ជាក់ថា រថយន្តចិនបច្ចុប្បន្ន ប្រឈមនឹងការយកពន្ធ ២៥ភាគរយ ដែលត្រូវបានដាក់ចេញ អំឡុងរដ្ឋបាលរបស់អតីតប្រធានាធិបតី លោក Donald Trump និងបន្តអនុវត្តដោយអ្នកស្នងតំណែងរបស់លោក គឺលោក Joe Biden៕