កំពង់ស្ពឺ៖ ដើម្បីរួមចំណែកជាមួយរាជរដ្ឋាភិបាល ក្នុងកាលៈទេសៈដែលប្រទេសជាតិ កំពុងតែញ៉ាំញ៉ីដោយសារការឆ្លងរាតត្បាតនៃជំងឺកូវីដ-១៩ ក្រៅពីចូលរួមក្នុងយុទ្ធនាការចាក់វ៉ាក់សាំងជាមួយគណៈកម្មាការចំពោះកិច្ចចាក់វ៉ាក់សាំងកូវីដ-១៩ ក្របខណ្ឌទូទាំងប្រទេស ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ក៏បានរៀបចំជាស្បៀងអាហារ និងថ្នាំសង្កូវចាំបាច់សម្រាប់ចែកជូនប្រជាពលរដ្ឋតាមខ្នងផ្ទះ ដែលកំពុងដាក់ខ្លួនដាច់ដោយឡែក ដើម្បីទប់ស្កាត់ការឆ្លងរាលដាលជំងឺកូវី-១៩ ផងដែរ។
ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន៩រូប ដឹកនាំដោយឯកឧត្តម វង្ស វ៉ាន់នី លោកវេជ្ជបណ្ឌិត សាយ ឫទ្ធី អនុប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី តំណាងឯកឧត្តម លេង ផាលី ប្រធានប្រតិបត្តិក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី សហការជាមួយមនី្ទរសុខាភិបាលខេត្តកំពង់ស្ពឺ លោក មួង ធី អភិបាលស្រុក សហភាពសហព័ន្ធយុវជនស្រុក និងអាជ្ញាធរមូលដ្ឋានស្រុកឱរ៉ាល់ បានពាំនាំនូវការសួរសុខទុក្ខ និងនាំយកអំណោយដ៏ថ្លៃថ្លារបស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ទៅចែកជូនប្រជាពលរដ្ឋចំនួន៣៧គ្រួសារ ដែលកំពុងដាក់ខ្លួនដាច់ដោយឡែកនៅតាមខ្នងផ្ទះ ដើម្បីបង្ការទប់ស្កាត់ការរីករាលដាលជំងឺកូវីដ-១៩ ក្នុងឃុំហោងសំណំ ស្រុកឱរ៉ាល់ ខេត្តកំពង់ស្ពឺ នាព្រឹកថ្ងៃទី១៨ ខែមិថុនា ឆ្នាំ២០២១នេះ។
លោកវេជ្ជបណ្ឌិត សាយ ឫទ្ធី តំណាងឲ្យក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានឆ្លៀតឱកាសដ៏មមាញឹក ដើម្បីចូលរួមក្នុងកិច្ចការងារសង្គម ក៏ដូចជាជួយសម្រួលក្នុងស្ថានភាពដែលប្រទេសជាតិយើងកំពុងតែជួបវិបតិ្តកូវីដ-១៩។ អំណោយដែលចែកជូនបងប្អូនគ្រួសារ ដែលកំពុងធ្វើចត្តាឡីស័កនៅតាមខ្នងផ្ទះនាថ្ងៃនេះ ក្នុងមួយគ្រួសារៗ ទទួលបានសម្ភារៈ និងបរិក្ខារការពារជំងឺកូវីដ-១៩ រួមមាន៖
ថ្នាំពេទ្យព្យាបាលជំងឺក្រពះពោះវៀន ថ្នាំវីតាមីន(Multivitamin) និងថ្នាំប៉ារ៉ា, ម៉ាស់ ១ប្រអប់ ចំនួន ៥០ម៉ាស់, ទឹកអាល់កុលដបធំ ចំណុះ ១លីត្រ, អង្ករ ១បាវ ចំនួន ២០គីឡូក្រាម, ទឹកត្រី ១យួរ, ត្រីខកំប៉ុង ចំនួន ១ដុំ និងមី ចំនួន ១កេះ។
ទន្ទឹមគ្នានោះដែរ លោក មួង ធី បញ្ជាក់ថា នៅក្នុងឃុំហោងសំណំ មានការរីករាលដាលជំងឺកូវីដ១៩ នៅថ្ងៃទី១២ ខែមិថុនា ឆ្នាំ២០២១ មកដល់ពេលនេះ មានប្រជាពលរដ្ឋចំនួន៦នាក់ វិជ្ជមានកូវីដ១៩ និងបងប្អូនប្រជាពលរដ្ឋចំនួន៣៧គ្រួសារ ស្ថិតនៅក្នុងភូមិចំនួន៣ គឺភូមិមនោរម្យ ភូមិតាំងរបង និងភូមិព្រៃទទឹង កំពុងដាក់ឲ្យរស់នៅដាច់ដោយឡែក រយៈពេល១៤ថ្ងៃ។ ដូច្នេះក្នុងនាមថ្នាក់ដឹកនាំស្រុក ក៏ដូចជាប្រជាពលរដ្ឋនៅក្នុងស្រុកឱរ៉ាល់ទាំងមូល ជាពិសេសបងប្អូនប្រជាពលរដ្ឋកំពុងដាក់ឲ្យធ្វើចត្តាឡីស័ករយៈពេល១៤ថ្ងៃ ចំនួន៣៧គ្រួសារនេះ សូមគោរពនូវការដឹងគុណ និងសូមថ្លែងអំណរគុណយ៉ាងជ្រាលជ្រៅជាទីបំផុតចំពោះឯកឧត្តម ហ៊ុន ម៉ានី អ្នកតំណាងរាស្ត្រមណ្ឌលកំពង់ស្ពឺ ដែលជានិច្ចកាលលោកតែងតែបានគិតគូរយកចិត្តទុកដាក់ខ្ពស់បំផុតអំពីសុខទុក្ខរបស់ប្រជាពលរដ្ឋ ជាពិសេសបញ្ហាសុខភាព និងជីវភាពរស់នៅរបស់ប្រជាពលរដ្ឋយើង។
ឆ្លៀតក្នុងឱកាសនោះដែរ ក្នុងនាមឯកឧត្តម លេង ផាលី លោកវេជ្ជបណ្ឌិត សាយ រិទ្ធី សូមអំពាវនាវដល់បងប្អូនប្រជាពលរដ្ឋក្នុងមូលដ្ឋានទាំងអស់ ក៏ដូចជានៅទូទាំងប្រទេស សូមឲ្យចូលរួមទប់ស្កាត់នូវជំងឺកូវីដ-១៩ និងចូលរួមសហការគ្នាចែករំលែកព័ត៌មានសុខភាព និងគ្រប់គ្រងសុខភាពក្នុងគ្រួសាររៀងខ្លួន៕ អត្ថបទ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
