អ្នកវិភាគ បានព្រមានថា ការវាយប្រហារលើកនាវាពាណិជ្ជកម្ម នៅសមុទ្រក្រហម មានហានិភ័យ ដោយជំរុញឲ្យតម្លៃប្រេង និងទំនិញផ្សេងទៀត កើនឡើង។

ក្រុមហ៊ុនជាច្រើន បានផ្អាកការដឹកជញ្ជូនឆ្លងកាត់ផ្លូវនេះ បន្ទាប់ពីនាវាត្រូវបានវាយប្រហារដោយក្រុមឧទ្ទាមហួទី នៅប្រទេសយេម៉ែន។

ក្រុមហ៊ុនដឹកជញ្ជូនធំទីពីររបស់ពិភពលោក Maersk បាននិយាយកាលពីថ្ងៃអង្គារថា ខ្លួននឹងប្តូរទិសដៅនាវាមួយចំនួនរបស់ខ្លួនជុំវិញឧបទ្វីប Cape of Good Hope របស់ទ្វីបអាហ្វ្រិក។

ការវាយប្រហារនេះ បាននាំឲ្យសហរដ្ឋអាមេរិក ចាប់ផ្តើមប្រតិបត្តិការកងទ័ពជើងទឹកអន្តរជាតិ ដើម្បីការពារនាវា នៅលើផ្លូវសមុទ្រក្រហមនេះ។

ប្រទេសដែលចូលរួមសកម្មភាពសន្តិសុខ ដែលមានឈ្មោះ Operation Prosperity Guardian រួមមានចក្រភពអង់គ្លេស កាណាដា បារាំង បារ៉ែន ន័រវែស និងអេស្ប៉ាញ។

សហរដ្ឋអាមេរិក ក៏បាននិយាយផងដែរថា ខ្លួននឹងស្វាគមន៍ប្រទេសចិន ដែលដើរតួក្នុងន័យស្ថាបនា ក្នុងការព្យាយាមទប់ស្កាត់មិនឲ្យមានការវាយប្រហារបន្ថែមទៀត។