អង្គការសុខភាពពិភពលោក (WHO) នៅថ្ងៃព្រហស្បតិ៍ (ទី២១ ខែធ្នូ) នេះ បាននិយាយថា តំបន់ហ្កាហ្សាភាគខាងជើង លែងមានមន្ទីរពេទ្យដំណើរការទៀតហើយ ដោយសារតែកង្វះខាតប្រេងឥន្ធនៈ បុគ្គលិក និងសម្ភារផ្គត់ផ្គង់។

យោងតាម WHO បានឲ្យដឹងថា មានតែកន្លែងសុខភាពចំនួន៩ ប៉ុណ្ណោះ ក្នុងចំណោម ៣៦កន្លែង ដែលមានដំណើរការផ្នែកខ្លះៗ ក្នុងហ្កាហ្សាទាំងមូល។ ទីកន្លែងទាំងអស់នេះ ត្រូវបានប្រមូលផ្តុំនៅភាគខាងត្បូងនៃតំបន់ហ៊ុមព័ទ្ធនេះ។

តំណាង WHO ប្រចាំតំបន់ហ្កាហ្សា លោក Richard Peeperkorn បានប្រាប់អ្នកសារព័ត៌មានតាមរយៈវីដេអូអនឡាញពីទីក្រុងហ្សេរុយសាឡិមថា៖ «ជាក់ស្ដែង មិនមានមន្ទីរពេទ្យ ដែលមានដំណើរការនៅសេសសល់ នៅភាគខាងជើងនោះទេ។ Al-Ahli គឺជាមន្ទីរពេទ្យចុងក្រោយ ប៉ុន្តែឥឡូវនេះ វាមានដំណើរការតិចតួចទៅៗហើយ ពោលគឺនៅតែព្យាបាលអ្នកជំងឺ ប៉ុន្តែមិនទទួលយកអ្នកជំងឺថ្មីទេ»។

ដោយពណ៌នាមន្ទីរពេទ្យនោះថា ជា «គ្រោងឆ្អឹងមន្ទីរពេទ្យ» លោក Peeperkorn បាននិយាយថា មន្ទីរពេទ្យ Al-Ahli ស្រដៀងទៅនឹងមន្ទីរពេទ្យសម្រាកព្យាបាល (គ្លីនិក) ដែលផ្តល់តំហែទាំតិចតួចណាស់។ លោកបាននិយាយថា បុគ្គលិកប្រហែល ១០នាក់ ដែលទាំងអស់ជាវេជ្ជបណ្ឌិត និងគិលានុបដ្ឋាយិកាមិនទាន់ចប់ការសិក្សា បន្តផ្តល់ជំនួយបឋម ជួយសម្រាលការឈឺចាប់ និងថែទាំមុខរបួស ជាមួយនឹងធនធានដ៏តិចតួច។

ក្រៅពីមន្ទីរពេទ្យ Al-Ahli នៅភាគខាងជើងតំបន់ហ្កាហ្សានេះ មានកន្លែងសុខភាព ដែលដំណើរការតិចតួចបំផុតចំនួន ៣ផ្សេងទៀត ដូចជាមន្ទីរពេទ្យ Al-Shifa, Al Awda និង Al Sahaba ដែលលោក Peeperkorn បាននិយាយថា កំពុងផ្តល់ជម្រកដល់មនុស្សរាប់ពាន់នាក់ ដែលផ្លាស់ទីលំនៅ៕