​វៀតណាម៖ អនុរដ្ឋមន្ត្រី​ក្រសួង​ការបរទេស​វៀតណាម​ លោក​ Nguyen Quoc Dung បាន​និយាយ​ទៅ​កាន់​កិច្ចប្រជុំ​ពិគ្រោះ​យោបល់​អាស៊ាន​រួម​ (JCM) ដោយ​បាន​ស្នើ​ឲ្យ​ប្រទេស​អាស៊ាន​បញ្ចប់​ក្របខ័ណ្ឌ​ច្រក​របៀង​ធ្វើដំណើរ សម្រាប់​ការ​បន្ត​ពាណិជ្ជកម្ម​ដ៏​មាន​សក្ដានុពល​ដោយមាន​សុវត្ថិភាព​។ ព្រឹត្តិការណ៍​នៃ​កិច្ច​ប្រជុំ​បាន​ធ្វើឡើង​តាមរយៈ​សន្និសីទ​វីដេអូ ដឹកនាំ​ដោយ​ប្រទេស​ព្រុយ​ណេ​ជា​ប្រធាន​អាស៊ាន​នៅ​ឆ្នាំ​២០២១ នេះ​។​

​បណ្ដា​ប្រទេស​ចូលរួម​ក្នុង​កិច្ចប្រជុំ​ បាន​ទទួល​ស្គាល់​វឌ្ឍនភាព​នៃ​ការ​កសាង​សហគមន៍​អាស៊ាន​ក្នុង​រយៈពេល​ ៦​ខែ​ចុងក្រោយនេះ​ ទោះបី​ស្ថានភាព​វីរុស ​COVID-19 ​មាន​ភាព​ស្មុគស្មាញ​នៅ​ក្នុង​តំបន់​ក៏ដោយ​។ ប្រទេស​ចូល​រួម​បាន​សម្ដែង​ការ​គាំទ្រ​ដល់​ប្រទេស​ព្រុយ​ណេ​ ក្នុង​ការ​ជំរុញ​គំនិត​ផ្ដួចផ្ដើម​ និង​អាទិភាព​សម្រាប់​អាស៊ាន​ឆ្នាំ​២០២១ និង​បាន​ឯកភាព​លើ​ផែនទី​បង្ហាញ​ផ្លូវ ​សម្រាប់​ការ​កសាង​ចក្ខុវិស័យ​សហគមន៍​អាស៊ាន​ក្រោយ​ឆ្នាំ​២០២៥។​ ​ក្រុម​មន្ត្រី​បាន​ព្រមព្រៀង​បង្កើន​ការស្វែងរក​ការ​ផ្គត់ផ្គង់​វ៉ាក់សាំង​វីរុស COVID-19 តាមរយៈ​អង្គការ​ UNICEF និង​មជ្ឈមណ្ឌល COVAX ដើម្បី​ផ្ដល់​ដល់​បណ្ដា​ប្រទេស​ជា​សមាជិក ដោយ​ស្នើ​ឱ្យ​អាស៊ាន​ប្រើ​ថវិកា​ចំនួន ១០.៥​លាន​ដុល្លារ​ភ្លាមៗ​ពី​មូលនិធិ​ឆ្លើយតប​វីរុស ​COVID-19​ ដើម្បី​ទិញ​វ៉ាក់សាំង​។ ដោយ​សង្កត់ធ្ងន់​ទៅលើ​សារៈសំខាន់ ​នៃ​ការ​ងើបឡើង​វិញ​ប្រកបដោយ​ចីរភាព ប្រទេស​នានា​បាន​គូស​បញ្ជាក់​ពី​ភាព​ចាំបាច់ ​នៃ​ការចូលរួម​របស់​ប្លុក​ទាំង​មូល​ក្នុង​ការ​អនុវត្ត​ក្របខ័ណ្ឌ ​ការ​ស្តា​ឡើង​វិញ​ដ៏​ទូលំទូលាយ​របស់​អាស៊ាន​ និង​ដើម្បី​គាំទ្រ​បណ្ដា​សហគ្រាស ក្រុម​ងាយ​រងគ្រោះ និង​តំបន់​ដាច់​ស្រយាល​ក្នុង​តំបន់៕​

អត្ថបទ៖ ប៊ុនថន