ភ្នំពេញ ៖ វេទិកានិពន្ធនាយកសារព័ត៌មានកម្ពុជា ដែលហៅកាត់ថា វ.ន.ស.ក.បានប្រកាសស្វែងរកការគាំទ្រដល់គម្រោងបង្កើតក្រុមប្រឹក្សាក្រមសីលធម៌សារព័ត៌មាន ដើម្បីធ្វើយ៉ាងណាលើកកម្ពស់គុណភាពវិជ្ជាជីវៈសារព័ត៌មានកម្ពុជា ឲ្យបានល្អប្រសើរឡើងវិញបន្ទាប់ពីក្នុងមួយរយៈពេលចុងក្រោយនេះ ត្រូវបានគេមើលឃើញថា វិស័យព័ត៌មានកំពុងធ្លាក់ចុះផ្នែកក្រមសីលធម៌ និងហាក់បីដូចធ្វើឲ្យមានភាពរញ៉េរញ៉ៃនៅក្នុងសង្គមជាដើម។

តាមរយៈសេចក្តីថ្លែងការណ៍រួមរបស់វេទិកានិពន្ធនាយកសារព័ត៌មានកម្ពុជា លើកទី២០ ដែលរៀបចំឡើងរបស់ក្លិបអ្នកកាសែតកម្ពុជានាថ្ងៃទី២១ ខែធ្នូ ឆ្នាំ២០២៣នេះបានលើកឡើងថា វ.ន.ស.ក. យល់ឃើញទៀតថា ការបណ្តុះបណ្តាល អប់រំ ផ្សព្វផ្សាយអំពីក្រមសីលធម៌វិជ្ជាជីវៈសារព័ត៌មាន នៅតែជាបញ្ហាស្នូលសម្រាប់អ្នកសារព័ត៌មាន ព្រោះស្ថាប័ន និងអ្នកសារព័ត៌មានហាក់មានកំណើនជាបន្តបន្ទាប់ ប៉ុន្តែមិនទាន់ទទួលបានការបណ្តុះបណ្តាលច្បាស់លាស់ ដែលជាហេតុធ្វើឱ្យកំហុសឆ្គងលើវិជ្ជា ជីវៈ និងក្រមសីលធម៌ងាយនឹងកើតឡើង។

 យ៉ាងណាក៏ដោយ«វ.ន.ស.ក. សូមអំពាវនាវដល់សមាគមអ្នកសារព័ត៌មាន និងអ្នកសារព័ត៌មានទាំងអស់ចូលរួមគាំទ្រដល់គម្រោងបង្កើតក្រុមប្រឹក្សាក្រមសីលធម៌សារព័ត៌មាន ដើម្បីឱ្យប្រព្រឹត្តទៅដោយរលូន និងប្រកប ដោយប្រសិទ្ធភាព ព្រោះថាវាពិតជាមានសារសំខាន់ណាស់សម្រាប់ការលើកកម្ពស់គុណភាពវិជ្ជាជីវៈ របស់អ្នកសារព័ត៌មានទាំងអស់ឲ្យទទួលបាននូវការគោរព ផ្តល់តម្លៃពីសាធារណជន និងអាជ្ញាធរគ្រប់មជ្ឈដ្ឋាន»។

 សេចក្តីថ្លែងការណ៍បានលើកឡើងទៀតថា វ.ន.ស.ក. យល់ឃើញថា មកដល់ពេលនេះការពង្រឹងក្រមសីលធម៌វិជ្ជាជីវៈសារព័ត៌មានកាន់តែមានសារសំខាន់ ក្នុងការលើកស្ទួយតម្លៃរបស់អ្នកសារព័ត៌មាន និងជំនឿរបស់មហាជនមកលើសារព័ត៌មាន ជាពិសេសក្នុងបរិបទនៃការរីកដុះដាលខ្លាំងនៃសារព័ត៌មានឌីជីថល។ ហើយវ.ន.ស.ក.យល់ឃើញផងដែរថា ដើម្បីពង្រឹងការអនុវត្តក្រមសីលធម៌វិជ្ជាជីវៈសារព័ត៌មានប្រកបដោយ ប្រសិទ្ធភាព ក្លិបអ្នកកាសែតកម្ពុជា និងសមាគមអ្នកសារព័ត៌មាននានា ត្រូវសហការជាមួយក្រសួងពាក់ព័ន្ធ ដើម្បីបង្កើតក្រុមប្រឹក្សាក្រមសីលធម៌ វិជ្ជាជីវៈសារព័ត៌មានមួយ ដែលមានមុខងារច្បាស់លាស់ក្នុងការតម្រង់ទិស ដាក់ពិន័យ ក៏ដូចជាកែលម្អវិជ្ជាជីវៈសារព័ត៌មាន ដូចអ្វីដែល វ.ន.ស.ក លើកទី១៩ បានអនុម័តយ៉ាងដូច្នេះដែរ។

 វ.ន.ស.ក. ក៏លើកឡើងផងដែរថា ដើម្បីឲ្យការអនុវត្តក្រមសីលធម៌វិជ្ជាជីវៈ សារព័ត៌មាន ប្រកបដោយប្រសិទ្ធភាពនោះ យើងគប្បីយកក្រមសីលធម៌នៃវិជ្ជាជីវៈសារព័ត៌មាន ដែលត្រូវបានចងក្រងដោយក្លិបអ្នក កាសែតកម្ពុជា មកធ្វើជាក្រមសីលធម៌វិជ្ជាជីវៈ សារព័ត៌មានគោលមួយ សម្រាប់ការអនុវត្តជាទូទៅនៅក្នុងសហគមន៍សារព័ត៌មាន។

តាមរយៈសេចក្តីថ្លែងការណ៍នេះ វ.ន.ស.ក. ក៏បានអំពាវនាវជាថ្មីម្តងទៀតដល់អ្នកសារព័ត៌មានទាំងអស់ ជាពិសេសអ្នកដែលទើបចូលបំពេញការងារ ក្នុងវិស័យសារព័ត៌មាន គប្បីយកចិត្តទុកដាក់ក្នុងការសិក្សាស្រាវជ្រាវ ឬក៏ចូលរួមក្នុងវគ្គបណ្តុះបណ្តាលវិជ្ជាជីវៈសារព័ត៌មាននិងក្រមសីលធម៌ បើសិនជាពួកគេមានបំណងក្លាយជាអ្នកសារព័ត៌មានអាជីព ហើយទទួលបានការគាំទ្រពីសាធារណជន។ ជាមួយគ្នានេះដែរ វ.ន.ស.ក. យល់ឃើញដេរថា បន្ទាប់ពីវេទិកានិពន្ធនាយកសារព័ត៌មានកម្ពុជាលើកទី២០បិទបញ្ចប់ ក្លិបអ្នកកាសែតកម្ពុជា គួរបន្តដើរតួនាទីស្នូលជាអ្នកសម្របសម្រួល និងពិគ្រោះយោបល់ជាមួយភាគីពាក់ ព័ន្ធទាំងអស់ ដើម្បីពិនិត្យលទ្ធភាពរៀបចំបង្កើត ក្រុមប្រឹក្សាក្រមសីលធម៌វិជ្ជាជីវៈសារព័ត៌មានមួយឲ្យបាន ឆាប់នាពេលខាងមុខ។

វ.ន.ស.ក. ក៏បានគោរពថ្លែងអំណរគុណជាអនេកប្បកា គោរពជូន សម្តេចអគ្គមហាសេនា បតីតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលតែងតែផ្តល់តម្លៃ ដល់វេទិកានិពន្ធនាយកសារព័ត៌មានកម្ពុជា ដោយបានយកឱកាសនេះចេញសារលិខិតផ្ញើជូន ចាងហ្វាង និពន្ធនាយក ក៏ដូចជាអ្នកប្រកបអាជីពវិជ្ជាជីវៈសារព័ត៌មានទាំងអស់នៅក្នុងព្រះរាជាណាចក្រកម្ពុជា៕ អត្ថបទ ៖ បាន ចក់