សភានៃប្រទេសអាល់បានី នៅថ្ងៃព្រហស្បតិ៍ (ទី២១ ខែធ្នូ) នេះ បានបោះឆ្នោតដកអភ័យឯកសិទ្ធិរបស់មេដឹកនាំគណបក្សប្រឆាំង លោក Sali Berisha បន្ទាប់ពីមានការចោទប្រកាន់លើរូបលោកពីបទប្រព្រឹត្តអំពើពុករលួយ ជាការសម្រេចចមួយ ដែលគេរំពឹងថា នឹងនាំទៅដល់ការចាប់ខ្លួនលោក។

កាលពីខែតុលា រដ្ឋអាជ្ញាបានធ្វើការចោទប្រកាន់លើលោក Berisha វ័យ ៧៩ឆ្នាំ ដែលជាអតីតប្រធានាធិបតី និងជានាយករដ្ឋមន្ត្រី ពាក់ព័ន្ធនឹងការប្រើប្រាស់ឥទ្ធិពលរបស់លោក ខណៈដែលកាន់តំណែងជានាយករដ្ឋមន្ត្រី ចន្លោះឆ្នាំ២០០៥ និងឆ្នាំ២០០៩។

លោក Berisha ដែលបានបដិសេធការចោទប្រកាន់នេះ បាននិយាយថា ការបោះឆ្នោតដោយសមាជិកសភារដ្ឋាភិបាលចំនួន ៧៥នាក់ នៅក្នុងសភាដែលមាន ១៤០អាសនៈ គឺខុសច្បាប់ និងមានហេតុផលខាងនយោបាយ។

សមាជិកសភា ដែលគាំទ្រលោក Berisha បានរំខានដល់សម័យប្រជុំ ដោយដុតគ្រាប់បែកផ្សែងពណ៌ខៀវ និងដាក់កៅអីគរគ្នានៅក្នុងបន្ទប់។

លោក Berisha បានធ្វើតួនាទីជាប្រធានាធិបតីពីឆ្នាំ១៩៩២ ដល់ឆ្នាំ១៩៩៧ ភ្លាមៗបន្ទាប់ពីការដួលរលំដ៏ច្របូកច្របល់នៃលទ្ធិកុម្មុយនីស្ត នៅក្នុងប្រទេសក្រីក្រភាគនិរតីនៃតំបន់បាល់កង់ និងជានាយករដ្ឋមន្ត្រីពីឆ្នាំ២០០៥ ដល់ឆ្នាំ២០១៣៕