នាយករដ្ឋមន្ត្រីហុងគ្រី លោក Viktor Orban បាននិយាយកាលពីថ្ងៃព្រហស្បតិ៍ (ទី២១ ខែធ្នូ) នេះថា លោកជឿជាក់ថា ការផ្តល់មូលនិធិរបស់សហភាពអឺរ៉ុបដល់អ៊ុយក្រែន មិនត្រូវយកចេញពីថវិការបស់សហភាពអឺរ៉ុប (EU) នោះទេ ហើយការកំណត់ពេលវេលា «សមហេតុសមផល» គួរតែត្រូវបានកំណត់ សម្រាប់ការផ្តល់ហិរញ្ញប្បទានណាមួយដល់អ៊ុយក្រែន។

លោក Orban បានប្រាប់សន្និសីទសារព័ត៌មានមួយថា៖ «ខ្ញុំជឿជាក់ថា ការផ្តល់ឲ្យអ៊ុយក្រែន ៥០ពាន់លានអឺរ៉ូ (៥៤,៧០ពាន់លានដុល្លារ) ពីថវិការបស់ EU សម្រាប់រយៈពេល ៥ឆ្នាំនោះ ជាការសម្រេចចិត្តមិនល្អនោះឡើយ»។

សូមបញ្ជាក់ថា បណ្ដារដ្ឋសហភាពអឺរ៉ុបទាំង២៧ លើកលែងតែប្រទេសហុងគ្រី បានព្រមព្រៀងគ្នា កាលពីសប្តាហ៍មុន ដើម្បីចាប់ផ្តើមកិច្ចពិភាក្សាចូលជាសមាជិកជាមួយអ៊ុយក្រែន បើទោះបីជាមានការលុកលុយពីរុស្ស៊ី ដោយឆ្លងកាត់ការជំទាស់ពីលោក Orban ដោយឲ្យរូបលោកចាកចេញពីបន្ទប់ អំឡុងពេលធ្វើកិច្ចប្រជុំកំពូល នៅពេលដែលការសម្រេច ត្រូវបានធ្វើឡើង។ លោក Orban បានបញ្ជាក់ថា សេចក្ដីសម្រេចនេះ ត្រូវបានស្នើឡើងដោយអធិការបតីអាល្លឺម៉ង់ លោក Olaf Scholz។

ប៉ុន្តែបណ្ដាមេដឹកនាំទាំងអស់ មិនអាចយកឈ្នះលើការជំទាស់របស់លោក Orban ក្នុងការកែប្រែថវិការបស់ EU ដើម្បីបញ្ជូន 50 ពាន់លានអឺរ៉ូទៅកាន់ទីក្រុងគីវ និងផ្តល់សាច់ប្រាក់បន្ថែមទៀត សម្រាប់កិច្ចការផ្សេងទៀត ដូចជាការគ្រប់គ្រងទេសន្តរប្រវេសន៍ជាដើម។

យ៉ាងណាក្ដី បណ្ដាមេដឹកនាំ EU ដែលមិនត្រឹមតែពេញចិត្តនឹងកិច្ចព្រមព្រៀងដែលគាំទ្រដោយសមាជិកទាំងអស់ ប៉ុន្តែក៏មានផែនការ B ផងដែរនោះ ត្រូវបានគេរំពឹងថា នឹងពិនិត្យមើលបញ្ហានេះឡើងវិញ នៅក្នុងកិច្ចប្រជុំកំពូលបន្ទាន់មួយ នៅថ្ងៃទី១ ខែកុម្ភៈ៕