ជនអន្តោប្រវេសន៍នៅប្រទេសម៉ិកស៊ិក បានប្រឈមទៅនឹងឧបសគ្គចុងក្រោយ ក្នុង​ផ្លូវ​របស់​ពួក​គេ​ចូល​ទៅកា​ន់សហរដ្ឋអាមេរិក កាលពីថ្ងៃព្រហស្បតិ៍ ដោយឆ្លងកាត់តំបន់ព្រំដែនទឹកទន្លេ Rio Bravo ដែលរដ្ឋតិចសាស់ បានដាក់របងបន្លាលួស និងសីតុណ្ហភាពត្រជាក់ខ្លាំងពេលយប់ មុន​ពេល​ដាក់​ពាក្យសុំសិទ្ធិជ្រកកោនរយៈពេលយូរ។

ទីក្រុង Eagle Pass និងទីក្រុង El Paso របស់រដ្ឋតិចសាស់ បានទទួល​អ្នក​ចំណូល​ថ្មី​រាប់​ពាន់​នាក់​​ក្នុង​ប៉ុន្មានថ្ងៃថ្មីៗនេះ ខណៈជនអន្តោប្រវេសន៍ រួមមានទាំង​គ្រួសារ និង​កុមារ​តូចៗ​ជា​ច្រើន​នាក់ ធ្វើដំណើរទៅកាន់ព្រំដែនដោយរថយន្តក្រុង រថភ្លើងដឹកទំនិញ ដោយថ្មើរជើង និង​ដោយសារ​ទោចក្រយាន។

នៅ​ក្នុងទីក្រុង Eagle Pass ជនអន្តោប្រវេសន៍រាប់រយនាក់ បាន​រង់ចាំនៅ​ខាង​ក្រៅ​ច្រកទ្វារ​ក្បែរ​ទន្លេ ដោយមួយចំនួនដណ្តប់ភួយ ដែលត្រូវបានរៀបចំដោយមន្ត្រីព្រំដែនសហរដ្ឋអាមេរិក កាល​ពី​ថ្ងៃ​ពុធ។

តុលាការឧទ្ធរណ៍សហរដ្ឋអាមេរិក កាលពីថ្ងៃ​អង្គារ​បាន​រារាំង​បណ្ដោះ​អាសន្ន​រដ្ឋបាល​របស់​ប្រធា​នា​ធិបតី លោក Joe Biden មិនឲ្យបំផ្លាញរបងលួស ដែលត្រូវ​បាន​តម្លើង​នៅ​លើដែនដី​ឯក​ជន​តាម​ដងទន្លេ Rio Bravo ដោយឆ្មាំជាតិរបស់រដ្ឋតិចសាស់ ជាផ្នែកមួយនៃប្រតិបត្តិការ Lone Star ដើម្បី​រារាំងការឆ្លងកាត់ព្រំដែនដោយខុសច្បាប់៕