បន្ទាយមានជ័យ​ ៖​ ឯកឧត្តម ឧត្តមសេនីយ៍ឯក ឯក សំអូន មេបញ្ជាការរង កងទ័ពជើងគោក មេ​បញ្ជាការ​យោធភូមិភាគទី៥ បានអញ្ជើញជាអធបិតីភាព​ សម្ពោធ​ដាក់​ឱ្យ​ប្រើប្រាស់ជាផ្លូវការអគារ​ និងសមិទ្ធផលនានា​ នៅទីបញ្ជាការ​ កងអនុសេនាធំទី២​ វរសេនាតូចរថក្រោះ៦៧​ ស្ថិតនៅ​ភូមិ​កងវ៉ា​ សង្កាត់កំពង់ស្វាយ​ ក្រុងសិរីសោភ័ណ​ ខេត្តបន្ទាយមានជ័យ។

នាឱកាសនោះ​ ឯកឧត្តម​ ឧត្តមសេនីយ៍ឯក​ ឯក​ សំអូន​ ណែនាំដល់បណ្តាកងឯកភាព​ទិសទី១​ យោធ​ភូមិភាគទី៥​ ត្រូវខិតខំក៏សាងអង្គភាពឱ្យបានរឹងមាំ​ ពង្រឹងនូវសាមគ្គី​ភាព ក៏កសាងជំរំជម្រក​ ខិតខំ​បណ្តុះបណ្តាលធនធានមនុស្សនៅក្នុងអង្គភាព​ ឱ្យទទួលបាននូវចំណេះជំនាញថ្មី​ បម្រើ​ដល់​អង្គភាព​។

ឯកឧត្តម​ ឧត្តមសេនីយ៍ឯក​ ឯក​ សំអូន​ ក៏បានដាក់ផែនការយុទ្ធសាស្រ្តមួយចំនួនជូនដល់ទិសទី១​ យោធ​ភូមិភាគទី៥​ ត្រូវពង្រឹងកិច្ចសហប្រតិបត្តិការ​ សហការជាមួយភាគីថៃ​ ក្នុងការ​ទប់​ស្កាត់​ឱ្យ​ម៉ឹង​ម៉ាត់​ នូវបទល្មើស​ បាតុភាពបង្កអសន្តិសុខដល់សង្គមជាតិ​ ទប់ស្កាត់និន្នការ​ដែល​ធ្វើ​ឱ្យ​អស្ថរភាព​សង្គម​ ដែលចំនុចនេះគឺជាការទទួលខុសត្រូវរបស់កងយោធពលខេមរភូមិន្ទ។ ជា​ពិសេស​ប្ដេជ្ញា​ការពារបូរណភាពទឹកដី ការពារ ព្រះមហាក្សត្រ ការពាររាជរដ្ឋាភិបាលស្របច្បាប់ ដែល​ប្រសូត្រចេញពីការបោះឆ្នោត​ ដែលមានសម្តេចមហាបវរធិបតី ហ៊ុន ម៉ាណែត ជាមគ្គុទេស ដ៏​ឆ្នើម​របស់​កម្ពុជា។

សូមបញ្ជាក់ថា​ អគារ​ និងសមិទ្ធផលនានា​ នៅទីបញ្ជាការ​ កងអនុសេនាធំទី២​ វរសេនា​តូច​រថ​ក្រោះ​​៦៧​ ដែលជាអំណោយដ៏ថ្លៃថ្លា​ ឯកឧត្តម ឧត្តមសេនីយ៍ឯក ឯក សំអូន​ មេបញ្ជាការរង កងទ័ព​ជើង​គោក មេបញ្ជាការយោធ ភូមិភាគទី៥ សប្បុរសជននិងយោធិនក្នុងអង្គភាព​ ចំណាយ​ថវិកា​សរុប​ចំនួន ៣២,០២២ដុល្លារ៕​ អត្ថបទ​ រឿង​ ចន្រ្ទា