ក្រុមហាម៉ាស ដែលជាអ្នកគ្រប់គ្រងតំបន់ហ្កាហ្សាស្ទ្រីប បានច្រានចោលការដោះលែងចំណាប់ថ្នូរបន្ថែមទៀត រហូតដល់អ៊ីស្រាអែលយល់ព្រម «បញ្ឈប់ការឈ្លានពានទាំងស្រុង»។ អ៊ីស្រាអែល បាននិយាយថាខ្លួនបានសម្លាប់យុទ្ធជនក្រុមហាម៉ាសជាង ២.០០០នាក់ នៅហ្កាហ្សាចាប់តាំងពីបទឈប់បាញ់កាលពីដើមខែនេះបញ្ចប់ នៅពេលដែលចំណាប់ថ្នូរជាង ១០០នាក់ត្រូវបានដោះលែង។

មនុស្សប្រហែល ១២០នាក់ទៀតដែលត្រូវបានចាប់ខ្លួនពីអ៊ីស្រាអែល នៅថ្ងៃទី០៧ ខែតុលា ត្រូវបានគេជឿថានៅតែជាប់ឃុំឃាំងនៅតំបន់ហ្កាហ្សា។

កិច្ចខិតខំប្រឹងប្រែងនៅតែបន្តនៅអង្គការសហប្រជាជាតិដើម្បីអនុម័តសេចក្ដីសម្រេចស្តីពីសង្គ្រាម។

សហរដ្ឋអាមេរិកបាននិយាយថា ខ្លួននៅតែមានការព្រួយបារម្ភយ៉ាងខ្លាំងចំពោះពង្រាងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដោយការបោះឆ្នោត ដែលត្រូវបានពន្យារពេលដល់ថ្ងៃសុក្រ (២២ ធ្នូ) នេះ។

នៅក្នុងសេចក្តីថ្លែងការណ៍មួយ ក្រុមហាម៉ាសបាននិយាយថា «មានការសម្រេចរបស់ប៉ាឡេស្ទីន ដែលថាមិនគួរមានការពិភាក្សាអំពីអ្នកទោស ឬកិច្ចព្រមព្រៀងដោះដូរអ្វីនោះទេ លើកលែងតែបន្ទាប់ពីអ៊ីស្រាអែលបញ្ចប់ការឈ្លានពានពេញលេញរបស់ពួកគេ»។

ការចរចាលើបទឈប់បាញ់ថ្មី បាននិងកំពុងប្រព្រឹត្តទៅនៅទីក្រុងគែរ ប្រទេសអេហ្ស៊ីប ទោះបីជាកិច្ចចរចាដំបូងកាលពីថ្ងៃពុធមិនមានការព្រមព្រៀងក៏ដោយ។ អ៊ីស្រាអែលបាននិយាយថា ខ្លួនគិតថាវិធីល្អបំផុតក្នុងការដោះលែងចំណាប់ថ្នូរ គឺដាក់សម្ពាធយោធាលើក្រុមហាម៉ាស និងដោយដំណើរការប្រតិបត្តិការជួយសង្គ្រោះ ប៉ុន្តែរហូតមកដល់ពេលនេះ វិធីសាស្ត្រនោះពិតជាមិនមានប្រសិទ្ធភាពទេ៕