ភ្នំពេញ៖ ស្ថានទូតកម្ពុជាប្រចាំសាធារណរដ្ឋកូរ៉េ បានសហការជាមួយសមាគម អ្នកនាំចូលកូរ៉េ (KITA) រៀបចំវេទិកាធុរកិច្ច និងវិនិយោគកម្ពុជា-កូរ៉េ លើកទី២ ដែលមានអ្នកចូលរួមជាង ២០០ នាក់ មកពីក្រុមហ៊ុននានា និងតំណាងមកពីសភាពាណិជ្ជកម្មកម្ពុជា ក្រសួងការងារ និងបណ្ដុះ បណ្ដាល​វិជ្ជាជីវៈ ក្រសួងឧស្សាហកម្ម វិទ្យាសាស្រ្ដ បច្ចេកវិទ្យា និងនវានុវត្តន៍ សមាគម សហ គ្រិន​វ័យ​ក្មេង​កម្ពុជា និងសមាគមអ្នកនាំចូលកូរ៉េ ។

វេទិកានេះធ្វើឡើងកាលពីរសៀលថ្ងៃទី២១ ខែធ្នូ ឆ្នាំ២០២៣ ក្នុងគោលបំណងជំរុញ និង​លើក​កម្ពស់​ឱកាស​វិនិយោគ រវាងកម្ពុជា-កូរ៉េ តាមរយៈការចែករំលែកព័ត៌មាន បទពិសោធន៍ ល្អៗ និង​គោល​នយោបាយ របស់រាជរដ្ឋាភិបាលកម្ពុជា ពាក់ព័ន្ធនឹងការវិនិយោគ ក៏ដូចជាបង្ក បរិយាកាស​ក្នុង​ការ​បង្កើត​ដៃគូថ្មីៗ សម្រាប់អ្នកវិនិយោគ នៃប្រទេសទាំងពីរ ។

ក្នុងវេទិកានោះ លោកជំទាវ ជ្រឹង បុទុមរង្សី ឯកអគ្គរាជទូតកម្ពុជាប្រចាំសាធារណរដ្ឋ កូរ៉េ មាន​ប្រសាស​ន៍​ថា ប្រទេសកម្ពុជា និងប្រទេសកូរ៉េ រក្សាបាននូវទំនាក់ទំនងដ៏ល្អ ដែលកើត ចេញ​ពី​ការ​ប្ដេជ្ញា​ចិត្ត​របស់​ភាគីទាំងពីរ។

លោកជំទាវបានបន្តថា ជាក់ស្ដែងភាគីទាំងពីរ មានយន្ដការជំរុញទំនាក់ទំនងសេដ្ឋកិច្ច ពាណិជ្ជកម្ម និងវិនិយោគ ដូចជាកិច្ចប្រជុំគណៈកម្មាធិការសេដ្ឋកិច្ចចម្រុះ កិច្ចព្រមព្រៀងស្ដីពី ការមិន​យក​ពន្ធត្រួតស៊ីគ្នា និងកិច្ចព្រមព្រៀងពាណិជ្ជកម្មសេរី ស្របពេលដែលប្រទេសទាំងពីរ ជា​សមាជិក​នៃ​ភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP), កិច្ចព្រមព្រៀងពាណិជ្ជកម្ម សេរី​អាស៊ាន-កូរ៉េ ហើយយន្តការទាំងអស់នេះ បាននិងកំពុងជំរុញ កិច្ចសហប្រតិបត្តិការផ្នែក សេដ្ឋកិច្ច ពាណិជ្ជកម្ម និងវិនិយោគនៃប្រទេសទាំងពីរ ។

លោក​ជំទាវឯកអគ្គរាជទូត បានបន្ថែមថា យន្ដការផ្នែកច្បាប់ ដូចជាច្បាប់វិនិយោគថ្មី របស់កម្ពុជា អនុក្រឹត្យ និងបទដ្ឋានគតិយុត្តិផ្សេងៗរបស់កម្ពុជា បានបង្កលក្ខណៈអំណោយផល និង​បង្កើត​ឱកាស​កាន់​តែ​ច្រើន​ដល់អ្នកវិនិយោគ ។

ក្នុងឱកាសនោះ លោក MARN Ki-jeong អនុប្រធានប្រតិបត្តិនៃសមាគមអ្នកនាំចូលកូរ៉េ បាន​ថ្លែងថា កម្ពុជា ជាប្រទេសដែលមានសក្ដានុពល ដោយ​អា​ច​រក្សា​បាន​នូវ​កំណើន​សេដ្ឋកិច្ច​របស់​ខ្លួន​ក្នុង​រង្វង់ ៧ភាគរយ ក្នុងរយៈពេល២ទសវត្សរ៍ចុងក្រោយនេះ ខណៈដែលប្រទេសនេះ ស្ថិត​នៅ​ក្នុង​ភូមិសាស្ដ្រ ដែលអាចតភ្ជាប់ទៅកាន់ទីផ្សារក្នុងតំបន់ និងពិភពលោក។

ក្នុង​វេទិកានេះ មានការធ្វើបទបង្ហាញពីស្ថាប័នពាក់ព័ន្ធផងដែរ អំពីស្ថានភាពសេដ្ឋកិច្ច របស់​ប្រទេស​កម្ពុជា គោលនយោបាយឌីជីថលូបនីយកម្ម និងឧស្សាហូបនីយកម្ម ច្បាប់ការងារ ច្បាប់​វិនិយោគ និងកត្តាអំណោយផលនានា ដែលគាំពារ និងគាំទ្រដល់ការ វិនិយោគ៕ អត្ថបទ៖ បាន សុខរិទ្ធិ