ពោធិ៍សាត់៖ តាមរយៈកិច្ចសហប្រតិបត្តិការ និងសម្ព័ន្ធមេត្រីភាព រវាងខេត្តពោធិ៍សាត់ នៃ​ព្រះរាជា​ណា​ចក្រ​កម្ពុជា និងស្រុក Yangpyeong ខេត្ត Gyeonggi-do នៃសាធារណរដ្ឋកូរ៉េខាងត្បូង ដែល​បាន​ធ្វើ​ពិធីចុះហត្ថលេខា កាលពីរសៀលថ្ងៃទី២១ ខែធ្នូ ឆ្នាំ២០២៣ នៅសាលា​ខេត្ត​ពោធិ៍សាត់ ក្រោមអធិបតីភាពឯកឧត្តម ខូយ រីដា អភិបាលខេត្តពោធិ៍សាត់ និងប្រតិភូប្រទេសកូរ៉េ ដឹកនាំ​ដោយលោក JEON JIN SEON អភិបាលស្រុក Yangpyeong បាន​ផ្តល់​អត្ថ​ប្រយោជន៍​ជា​ច្រើន​ដល់​ខេត្តពោធិ៍សាត់ ក៏ដូចជាខេត្តGyeonggi-do ជាពិសេសនោះគឺកិច្ចសហប្រតិបត្តិការនេះ បាន​បើក​ឱកាស អោយប្រជាពលរដ្ឋ និងយុវជនក្នុងខេត្តពោធិ៍សាត់ អាចទៅទទួលការ

បណ្តុះ​បណ្តាល និងធ្វើការរកកម្រៃ ផ្នែកកសិកម្មនៅស្រុកYangpyeong ខេត្តGyeonggi-do ប្រទេស​កូរ៉េបាន ។

តាមរយៈកិច្ចសម្ភាសន៍ជាមួយ ទូរទ្សស៍BTV លោក JEON JIN SEON អភិបាលស្រុក Yangpyeong បានអោយដឹងថា កន្លងមកយើងធ្លាប់ធ្វើកិច្ចសហប្រតិបត្តិការ នាំយក យុវជន​កម្ពុជា​ពី​ខេត្តសៀបរាម ទៅបណ្តុះបណ្តាលនិងធ្វើការផ្នែកកសិកម្មរួមហើយ ដោយ​យុវជន​កម្ពុជា​មាន​ភាព​អំណត់ និងខិតខំធ្វើការបានយ៉ាងល្អ ជាហេតុនាំអោយបណ្តាលម្ចាស់ក្រុមហ៊ុន ឬ​ម្ចាស់​កសិដ្ឋាន​ក្នុង​ស្រុក Yangpyeong មានតម្រូវការយុវជនកម្ពុជា ដើម្បីបំពេញ​ការងារ​ជា​ច្រើន​កន្លែង​បន្ថែម​ទៀត ហើយពោធិ៍សាត់ ជាខេត្តដែលមានសក្តានុពលផ្នែកកម្លាំងពលកម្ម។

គួរអោយដឹងដែរថា កិច្ចសហប្រតិបត្តិការ និងសម្ព័ន្ធមេត្រីភាព រវាងខេត្តពោធិ៍សាត់ នៃ​ព្រះរា​ជា​ណា​ចក្រ​កម្ពុជា និងស្រុក Yangpyeong ខេត្ត Gyeonggi-do នៃសាធារណរដ្ឋកូរ៉េខាងត្បូង លើ​វិស័យ​កសិកម្មរួមមាន៖

ទី១-ចែករំលែក និងប្រើប្រាស់ធនធាន នៃតំបន់ទាំងពីរ ឱ្យបានច្រើនតាមតែអាចធ្វើទៅបាន និង​សហការគ្នា ដើម្បីលើកកម្ពស់ការប្រកួតប្រជែងផ្នែកកសិកម្ម និងបង្កើនប្រាក់ចំណូលកសិកម្ម។

ទី២-ជំរុញការផ្លាស់ប្តូរ និងកិច្ចសហប្រតិបត្តិការយ៉ាងសកម្ម លើការ​បណ្តុះ​បណ្តាល​ធន​ធាន​មនុស្ស និងការផ្លាស់ប្តូរព័ត៌មានចាំបាច់ សម្រាប់ការអភិវឌ្ឍន៍កសិកម្ម និងជនបទ, ផ្តល់​ភាព​ងាយ​ស្រួល សម្រាប់ការផ្លាស់ប្តូរបច្ចេកវិទ្យាកសិកម្ម, ទស្សនកិច្ច និងបណ្តុះបណ្តាល ដល់អ្នកពាក់ព័ន្ធ ដើម្បី​ផ្លាស់ប្តូរ និងសហការបច្ចេកវិទ្យាកសិកម្ម។

ទី៣-រួមចំណែកដល់ការអភិវឌ្ឍន៍តំបន់ទាំងពីរ ដោយបន្ត​ធ្វើការ​លើ​បញ្ហា​ដែល​មាន​ផល​ប្រយោជន៍​រួម ដូចជាការអនុវត្តកម្មវិធីអភិវឌ្ឍន៍រួមគ្នាឱ្យបានរហ័ស។

ក្នុងនាម រដ្ឋបាលខេត្ត និងប្រជាជនខេត្តពោធិ៍សាត់ ឯកឧត្តម ខូយ រីដា បាន​បង្ហាញ​អារម្មណ៍​សប្បាយ​រីករាយ និងគាំទ្រ ដោយប្តេជ្ញាខិតខំជម្រុញកិច្ចសហការ លើ​ប្រតិបត្តិការ​វិស័យ​ទេសចរណ៍​ វប្បធម៌ សេដ្ឋកិច្ច អប់រំ កសិកម្ម ជាមួយស្រុក Yangpyeong ខេត្ត Gyeonggi-do នៃ​សាធារណរដ្ឋកូរ៉េដោយស្របតាមគោលនយោបាយ​ នៃប្រទេសទាំងពីរ៕ អត្ថបទ៖ ភិរុណ ពៅ