រដ្ឋមន្ត្រីក្រសួងឧស្សាហកម្មជប៉ុន លោក Ken Saito នៅថ្ងៃសុក្រ (ទី២២ ខែធ្នូ) នេះ បាននិយាយថា ទំនាក់ទំនងរវាងអាមេរិក និងជប៉ុន មានភាព «រឹងមាំជាងពេលណាៗទាំងអស់» ទោះបីជាលោកបានបដិសេធមិនធ្វើអត្ថាធិប្បាយដោយផ្ទាល់លើការកើនឡើងនៃការត្រួតពិនិត្យ នៅសហរដ្ឋអាមេរិកលើកិច្ចព្រមព្រៀងដែលបានស្នើឡើង ដើម្បីឲ្យក្រុមហ៊ុនជប៉ុន Nippon Steel ទិញយកក្រុមហ៊ុនដែកថែបរបស់សហរដ្ឋអាមេរិកក៏ដោយ។

អំឡុងពេលនិយាយនៅឯសន្និសីទសារព័ត៌មាន ដែលតែងត្រូវបានបរៀបចំជាប្រចាំ លោក Saito បានប្រាប់ថា លោកបានដឹងពីសេចក្តីថ្លែងការណ៍របស់ប្រធានក្រុមប្រឹក្សាសេដ្ឋកិច្ចជាតិរបស់សហរដ្ឋអាមេរិកថា ការទិញដូរនេះ សមនឹងមាន «ការត្រួតពិនិត្យយ៉ាងម៉ត់ចត់» ប៉ុន្តែនឹងមិនធ្វើអត្ថាធិប្បាយដោយផ្ទាល់លើកិច្ចព្រមព្រៀងឯកជននោះទេ។

លោកបាននិយាយថា៖ «ខ្ញុំជឿថា ក្រុមហ៊ុន Nippon Steel គ្រាន់តែត្រូវការចាត់វិធានការត្រឹមត្រូវតាមនីតិវិធីប៉ុណ្ណោះ។ ក្នុងករណីណាក៏ដោយ សម្ព័ន្ធភាពជប៉ុន-អាមេរិក មានភាពកាន់តែរឹងមាំជាងពេលណាៗទាំងអស់ ហើយវាមានសារៈសំខាន់ណាស់ ក្នុងការធ្វើការរួមគ្នា ក្នុងវិស័យសន្តិសុខសេដ្ឋកិច្ច»។

សូមបញ្ជាក់ថា សេតវិមាន កាលពីថ្ងៃព្រហស្បតិ៍ (ទី២១ ខែធ្នូ) បាននិយាយថា ការស្នើរបស់ក្រុមហ៊ុន Nippon Steel នូវទឹកប្រាក់ ១៤,៩ពាន់លានដុល្លារអាមេរិក ដែលសុំទិញក្រុមហ៊ុនដែកថែបអាមេរិក ចាំបាច់ត្រូវពិនិត្យយ៉ាងម៉ត់ចត់ ដោយសារតួនាទីស្នូលរបស់ក្រុមហ៊ុន នៅក្នុងការផលិតដែកអាមេរិក មានសារៈសំខាន់ចំពោះសន្តិសុខជាតិ៕