បុគ្គលជិតស្និទ្ធនឹងលោក Donald Trump គឺលោក Rudy Giuliani បានដាក់ពាក្យសុំក្ស័យធន កាលពីថ្ងៃព្រហស្បតិ៍ (ទី២១ ខែធ្នូ) ពោលគឺប៉ុន្មានថ្ងៃបន្ទាប់ពីគណៈវិនិច្ឆ័យ បានសម្រេចថា លោកត្រូវតែសងជំងឺចិត្តជាង ១៤៨លានដុល្លារដល់អតីតបុគ្គលិករៀបចំការបោះឆ្នោត ២នាក់ នៅរដ្ឋចចជៀ ដែលលោកបានបបរិហារកេរ្តិ៍ដោយការចោទប្រកាន់មិនពិតថា ពួកគេជួយបន្លំការបោះឆ្នោតឆ្នាំ២០២០។

ឯកសារតុលាការ បានបង្ហាញថា លោក Giuliani ដែលបានជួយអតីតប្រធានាធិបតីលោក Trump របស់គណបក្សសាធារណរដ្ឋ បង្កើនការអះអាងមិនពិតរបស់លោកអំពីការលួចបន្លំការបោះឆ្នោតឆ្នាំ២០២០ នោះ បានដាក់ញត្តិនៅតុលាការក្ស័យធនសហរដ្ឋអាមេរិក សម្រាប់តំបន់ភាគខាងត្បូងនៃទីក្រុងញូវយ៉ក។

នៅក្នុងឯកសារនោះ លោក Giuliani បានប្រាប់ថា លោកមានបំណុលពី ១០០លានដុល្លារទៅ ៥០០លានដុល្លារ និងមានទ្រព្យសម្បត្តិពី ១លានដុល្លារទៅ ១០លានដុល្លារ។ លោក Giuliani បានបន្ថែមថា លោកជំពាក់ ១៤៨លានដុល្លារ ចំពោះអ្នកនាង Ruby Freeman និងអ្នកនាង Wandrea Moss ដែលជាអតីតបុគ្គលិករៀបចំការបោះឆ្នោតទាំង ២នាក់ នៅរដ្ឋចចជៀ។

ឯកសារនេះក៏បានដាក់ឈ្មោះកូនប្រុសរបស់ប្រធានាធិបតីលោក Joe Biden គឺលោក Hunter Biden ជាម្ចាស់បំណុលផងដែរ តែមិនបានបញ្ជាក់ពីចំនួនទឹកប្រាក់ដែលលោកជំពាក់នោះឡើយ។ លោក Hunter Biden កាលពីខែកញ្ញា បានប្តឹងលោក Giuliani ពីបទរំលោភលើឯកជនភាពរបស់លោក ជុំវិញទិន្នន័យ ដែលត្រូវបានចោទប្រកាន់ថា យកចេញពីកុំព្យូទ័រយួរដៃរបស់លោក៕