ព្យុះប៉ាស៊ីហ្វិកដ៏ខ្លាំងក្លាមួយ បានបោកបក់នៅភាគខាងត្បូងរដ្ឋកាលីហ្វ័រញ៉ា សហរដ្ឋអាមេរិក ដោយមានភ្លៀងធ្លាក់យ៉ាងខ្លាំង កាលពីថ្ងៃព្រហស្បតិ៍ (ទី២១ ខែធ្នូ) ដែលនាំឲ្យមានទឹកជំនន់យ៉ាងគំហុកភ្លាមៗ នៅទីក្រុងឆ្នេរសមុទ្រ Santa Barbara។

មន្ត្រីពន្លត់អគ្គិភ័យមូលដ្ឋាន បាននិយាយថា ការអង្កេតតាមដាន កំពុងត្រូវបានធ្វើឡើង ដើម្បីកំណត់ទីកន្លែង ដែលការងារសាធារណៈ និងរថយន្តអនុវត្តច្បាប់ គួរត្រូវបានបញ្ជូនទៅ។

សេវាអាកាសធាតុជាតិ បានឲ្យដឹងថា នៅកន្លែងមួយ កម្រិតទឹកភ្លៀងមានលើសពី ៣អ៊ីញ (៧,៦ សង់ទីម៉ែត្រ) ក្នុងមួយម៉ោង នៅតំបន់ Ventura ភាគពាយព្យនៃទីក្រុង Los Angeles ទោះបីជាភ្លៀងបានធូរស្រាលបន្តិច នាពេលក្រោយមកក្នុងថ្ងៃនោះក៏ដោយ។

បណ្ដាអ្នកព្យាករ បាននិយាយថា ព្យុះនេះនឹងបន្តនាំឲ្យមានភ្លៀងធ្លាក់ និងព្យុះផ្គររន្ទះទៅកាន់ផ្នែកភាគខាងត្បូងនៃរដ្ឋ និងទៅកាន់រដ្ឋ Arizona នៅថ្ងៃសុក្រ (ទី២២ ខែធ្នូ) នេះ៕