វិមានក្រឹមឡាំង បានចោទប្រកាន់សារព័ត៌មាន Wall Street Journal (WSJ) ថា បានចេញផ្សាយ «រឿងប្រឌិដ្ឋ» នៅថ្ងៃសុក្រ (ទី២២ ខែធ្នូ) នេះ បន្ទាប់ពីសារព័ត៌មាននេះ បានរាយការណ៍ថា ការស្លាប់របស់មេដឹកនាំទាហានស៊ីឈ្នួល លោក Yevgeny Prigozhin ក្នុងឧបទ្ទវហេតុធ្លាក់យន្តហោះ ត្រូវបានរៀបចំឡើងដោយមន្ត្រីសន្តិសុខរុស្ស៊ី លោក Nikolai Patrushev។

WSJ បានរាយការណ៍ថា យន្តហោះឯកជនរបស់លោក Prigozhin ត្រូវបានធ្វើឲ្យធ្លាក់ដោយគ្រាប់បែកតូចមួយដាក់នៅក្រោមស្លាបយន្តហោះ។ របាយការណ៍របស់សារព័ត៌មាននេះ បានដកស្រង់សម្ដីមន្ត្រីចារកម្មលោកខាងលិចដែលមិនបញ្ចេញឈ្មោះ និងអតីតមន្ត្រីចារកម្មរុស្ស៊ីម្នាក់។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា លោកបានឃើញរបាយការណ៍នេះ ប៉ុន្តែនឹងមិនធ្វើអត្ថាធិប្បាយលើការចេញផ្សាយនេះទេ មុននឹងលោកបន្ថែមថា «គួរឲ្យសោកស្ដាយ ថ្មីៗនេះ សារព័ត៌មាន Wall Street Journal ចូលចិត្តផលិតសាច់រឿងប្រឌិដ្ឋណាស់»។

សូមបញ្ជាក់ថា លោក Prigozhin ដែលជាប្រធានក្រុមទាហានស៊ីឈ្នួល Wagner ដែលប្រយុទ្ធឲ្យភាគីរុស្ស៊ី ក្នុងប្រទេសអ៊ុយក្រែន បានធ្វើឲ្យមានជម្លោះដ៏រ៉ាំរ៉ៃជាមួយស្ថាប័នការពារជាតិ រហូតឈានដល់ការបះបោរភា្លមៗ កាលពីចុងខែមិថុនា។ ការបះបោរនោះបានបញ្ចប់ទៅយ៉ាងឆាប់រហ័ស ប៉ុន្តែត្រូវបានគេមើលឃើញយ៉ាងទូលំទូលាយថា ជាបញ្ហាប្រឈមដ៏ធ្ងន់ធ្ងរ ចំពោះការកាន់អំណាចជិត ២៥ឆ្នាំរបស់ប្រធានាធិបតីរសុស្ស៊ី លោក Vladimir Putin។ លោក Prigozhin បានស្លាប់ ក្នុងគ្រោះថ្នាក់ធ្លាក់យន្តហោះយ៉ាងពិតប្រាកដមួយ នៅ ២ខែក្រោយមក៕