នគរបាលរបស់សាធារណរដ្ឋឆែក បានរឹតបន្តឹងសន្តិសុខ ជុំវិញសាលារៀន និងអគារសាធារណៈផ្សេងទៀតនៅទូទាំងប្រទេស ហើយសាកលវិទ្យាល័យ Charles នៃទីក្រុង Prague បានលុបចោលការបង្រៀន និងព្រឹត្តិការណ៍ទាំងអស់ នៅថ្ងៃសុក្រ (ទី២២ ខែធ្នូ) នេះ បន្ទាប់ពីនិស្សិតម្នាក់ បានបាញ់សម្លាប់មនុស្ស ១៤ នាក់ នៅឯអគារសាកលវិទ្យាល័យមួយ កាលពីថ្ងៃព្រសហស្បតិ៍ (ទី២១ ខែធ្នូ)។

ការបាញ់ប្រហារនេះ គឺជាព្រឹត្តិការណ៍ដ៏អាក្រក់បំផុតមិនធ្លាប់មាន នៅក្នុងប្រទេសអឺរ៉ុបកណ្តាលមួយនេះ ដែលប្រជាជនភាគច្រើនកាន់កាប់កាំភ្លើង ដោយខ្លះជាប្រភេទកាំភ្លើងប្រកួតកីឡា ឬកាំភ្លើងបាញ់សត្វ ប៉ុន្តែការបាញ់ប្រហារច្រើនគ្រាប់បែបនេះ គឺកម្រណាស់។

ប្រជាជនកំពុងអុជទៀននៅខាងក្រៅទីស្នាក់ការកណ្តាលនៃសាកលវិទ្យាល័យ តាំងពីល្ងាចថ្ងៃទី២១ ខែធ្នូ ហើយថ្នាក់ដឹកនាំនៃសាកលវិទ្យាល័យនានា គ្រោងនឹងទៅគោរពនៅទីនោះ នាព្រឹកថ្ងៃទី២២ ខែធ្នូនេះ។

រដ្ឋមន្ត្រីក្រសួងមហាផ្ទៃលោក Vit Rakusan បាននិយាយតាមវិទ្យុផ្សាយសំឡេងឆែកថា ជនរងគ្រោះ ១៣នាក់ ក្នុងចំណោម ១៤នាក់ ត្រូវបានកំណត់អត្តសញ្ញាណ។ ក្រសួងបាននិយាយថា មានពលរដ្ឋអារ៉ាប់រួម២នាក់ និងជនជាតិហូឡង់ម្នាក់ ក្នុងចំណោមអ្នករងរបួស។

អាជ្ញាធរមិនបានផ្តល់ព័ត៌មានថ្មីអំពីស្ថានភាពអ្នករបួស ក្នុងការវាយប្រហារនោះទេ។ នគរបាលបាននិយាយថា ខ្មាន់កាំភ្លើងអាយុ ២៤ឆ្នាំ បានស្លាប់ កាលពីថ្ងៃទី២១ ខែធ្នូ នៅឯអគារសាកលវិទ្យាល័យ ដោយប្រហែលជាបន្ទាប់ពីសម្លាប់ខ្លួនឯង ឬដោយត្រូវគ្រាប់កាំភ្លើងរបស់នគរបាល៕