ពួកជនមូស្លីមបាននាំគ្នាអធិដ្ឋាននៅតាមដងផ្លូវនៃទីក្រុងបុរាណរបស់ទីក្រុងហ្សេរុយសាឡិម នៅថ្ងៃសុក្រ (ទី២២ ខែធ្នូ) នេះ បន្ទាប់ពីកងកម្លាំងអ៊ីស្រាអែលបានរារាំងពួកគេមួយចំនួនមិនឲ្យចូលទៅក្នុងបរិវេណវិហារអ៊ីស្លាម Al-Aqsa ដោយសារតែការរឹតបន្តឹងសន្តិសុខ។

មានការអំពាវនាវឲ្យអ្នកគោរពបូជាចូលរួមការអធិដ្ឋាន នាថ្ងៃសុក្រនេះ នៅខាងក្រៅបរិវេណនោះ ដោយផ្គើននឹងការបញ្ជា ដែលអស់រយៈពេលជាច្រើនសប្តាហ៍ បានកម្រិតការចូលទីកាន់ទីកន្លែងមានបញ្ហានេះ ចំពោះស្ត្រី និងមនុស្សវ័យចំណាស់។

ទីតាំងសក្ការៈដ៏ពិសិដ្ឋបំផុតទី៣ របស់សាសនាអ៊ីស្លាម ដែលត្រូវបានសាងសង់នៅលើដី ដែលត្រូវបានគោរពដោយជនជាតិជ្វីហ្វ ដែលស្គាល់ថាជា Temple Mount (វិហារភ្នំ) បានក្លាយជាចំណុចស្នូលនៃភាពតានតឹង រវាងជនជាតិជ្វីហ្វ និងពួកមូស្លីមជាយូរមកហើយ។

នគរបាលបានបាញ់ផ្សែង ដើម្បីបំបែកយុវជនមួយក្រុមតូចៗ ដែលប្រមូលផ្តុំនៅជិតទីក្រុងបុរាណនេះ និងនៅវិហារអ៊ីស្លាម ក្នុងក្រុងហ្សេរុយសាឡិមខាងកើត ប៉ុន្តែនគរបាលក៏បានចែកចាយវីដេអូ ដែលបង្ហាញពីអ្នកគោរពបូជា ដែលមកដល់ដោយស្ងប់ស្ងាត់។

វិហារអ៊ីស្លាមមួយចំនួន នៅក្រុងហ្សេរុយសាឡិមខាងកើត បានបិទទ្វារ នៅថ្ងៃសុក្រ ហើយបានជំរុញឲ្យមនុស្សទៅវិហារ Al Aqsa ហើយអធិស្ឋាននៅច្រកទ្វារនៃវិហារអ៊ីស្លាម «ដើម្បីបំបែកការហ៊ុមព័ទ្ធ»៕