ព្រះវិហារ : ផ្លូវក្រាលដីល្បាយគ្រួសស្តារឡើងវិញ ចំនួនមួយខ្សែ ប្រវែងជាង ១១ គីឡូម៉ែត្រ ស្ថិតនៅក្នុងឃុំយាង ស្រុកជាំក្សាន្ត ខេត្តព្រះវិហារ ត្រូវបានស្ថាបនាឡើងវិញរួចរាល់ ដោយផ្លូវនេះបានផ្តល់អត្ថប្រយោជន៍យ៉ាងខ្លាំង សម្រាប់ការធ្វើដំណើរ ការដឹកជញ្ជូនកសិផល ជាពិសេសសម្រាប់គ្រួសារកងទ័ពរស់នៅតំបន់នោះ។

ឯកឧត្តម អុិន ចន្ថា រដ្ឋលេខាធិការក្រសួងអភិវឌ្ឍន៍ជនបទ និងជាសមាជិកគណៈកម្មាធិការលទ្ធកម្ម នៅថ្ងៃទី ២២ ខែ ធ្នូ ឆ្នាំ ២០២៣ នេះ បានដឹកនាំក្រុមការងារអន្តរក្រសួង ចុះត្រួតពិនិត្យ និងវាយតម្លៃ-ប្រគល់ទទួល លើការងារស្តារឡើងវិញ ផ្លូវក្រាលដី ល្បាយគ្រួស ចំនួន១ ខ្សែ, ប្រវែង ១១ ៥០០ ម៉ែត្រ, ទទឹង ២ ម៉ែត្រ, កម្រាស់ ០,២ ម៉ែត្រ និងផ្លាកសញ្ញាចំនួន ២ កន្លែង ស្ថិតនៅភូមិ កោងយោង ទៅកាន់ភូមិយាង ក្នុងឃុំយាង ស្រុកជាំក្សាន្ត ខេត្តព្រះវិហារ។

ទាក់ទងគម្រោងផ្លូវខាងលើនេះ, ឯកឧត្តម បានកោតសរសើរចំពោះការយកចិត្តទុកដាក់ ស្តារផ្លូវនេះឡើងវិញបានល្អប្រសើរ និងបានឯកភាព ប្រគល់-ទទួលទាំងស្រុង ដែលបានអនុវត្តទៅតាមផែនការ និងប្រកបដោយគុណភាព ព្រោះផ្លូវមានសារៈសំខាន់ ណាស់ ក្នុងការជួយសម្រួលដល់ការធ្វើដំណើររបស់ប្រជាពលរដ្ឋ មិនថាប្រជាពលរដ្ឋនៅមូលដ្ឋាន ឬប្រជាពលរដ្ឋធ្វើដំណើរឆ្លងកាត់ នោះឡើយ ជាពិសេសការផ្តល់អត្ថប្រយោជន៍ក្នុងការដឹកជញ្ជូនកសិផលរបស់កសិករនៅតំបន់នោះ ការធ្វើដំណើររបស់សិស្សានុសិស្ស ទៅរៀនសូត្រ ការដឹកអ្នកជម្ងឺមកកាន់មណ្ឌលសុខភាព ជាពិសេសដល់គ្រួសារកងទ័ពដែលរស់នៅតំបន់នោះផងដែរ។

សូមបញ្ជាក់ថា ទាក់ទងការងារស្តារឡើងវិញផ្លូវក្រាលដីល្បាយគ្រួស ចំនួន ១ ខ្សែ នៅក្នុងឃុំយាង ស្រុកជាំក្សាន្ត ខេត្តព្រះវិហារនេះ បានអនុវត្តដោយនាយកដ្ឋានវិស្វកកម្ម នៃក្រសួងការពារជាតិ ដោយប្រើប្រាស់ថវិការជំពូកទី ២១។ ជុំវិញបញ្ហាហេដ្ឋរចនាសម្ព័ន្ធនេះ នៅក្នុងអាណត្តិទី ៧ នៃរដ្ឋសភា, រាជរដ្ឋាភិបាលកម្ពុជា នឹងបន្តការគាំទ្រដល់ការជួសជុល ថែទាំផ្លូវ ស្ពាន និងផ្លូវលំជនបទ ព្រមទាំង ការស្តារស្រះ ជីកស្រះ អណ្តូងទឹក ដើម្បទប់ទល់និងភាពរាំស្ងួត និងទឹកជំនន់ជាដើម៕

អត្ថបទ៖ សុន រ៉ាឌី