ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក្នុងទិវាអន្តរជាតិសម្រាប់ទេសន្តរប្រវេសករឆ្នាំ២០២៣ កាលពីថ្ងៃទី២២ ខែធ្នូម្សិលមិញ បានលើកឡើងថា ការធ្វើទេសន្តរប្រវេសន៍ជោគជ័យ ត្រូវការភាគីចំនួន៥សប្បាយចិត្ត។ ភាគីទាំង៥នោះរួមមាន៖

ទី១ ពលករខ្មែរដែលចង់ធ្វើការនៅបរទេសប្បាយចិត្ត​ព្រោះមានការងារ​ដែល​មាន​លក្ខខណ្ឌ​សមរម្យ​ និងមានការយកចិត្តទុកដាក់ និងទទួលបានព័ត៌មានគ្រប់ជ្រុងជ្រោយ

ទី២ និយោជក នៃប្រទេសទទួល​ពលករ​ដែល​ត្រូវ​តែ​សប្បាយចិត្ត​​ព្រោះមាន​កម្លាំង​ពលកម្ម​សម្រាប់​សង្វាក់​ផលិតកម្មរបស់ខ្លួន។

ទី៣  ក្រុមគ្រួសាររបស់ពលករទាំងអស់​សប្បាយចិត្ត និង​អបអរ​សាទរ​ព្រោះ​កូន​ចៅ​របស់​ខ្លួន​មាន​ការងារ​ធ្វើ​ដោយសុ​វត្ថិភាព និងមានការយកចិត្តទុកដាក់ពីរដ្ឋាភិបាល

ទី៤ អ្នកសម្របសម្រួល ឬភ្នាក់ងារជ្រើសរើសឯកជនពីប្រទេសបញ្ជូន និងដៃគូរទីភ្នាក់​ងារ​ជ្រើស​រើស​ឯ​កជនកម្ពុជានៅប្រទេសគោលដៅដែលគេចផុតពីបណ្តឹងរបស់ពលករ និង​ទទួល​បាន​ប្រាក់​ចំណេញ​សមរម្យ​ដោយមិនហួសហេតុដែលគ្រប់ភាគីទទួលលយកបាន។ 

ទី៥ ចុងក្រោយ រដ្ឋាភិបាលប្រទេសបញ្ជូន និងប្រទេសទទួលដែលត្រូវសប្បាយចិត្ត។ ត្រង់​ចំណុច​នេះ ឯកឧត្ដម​រដ្ឋមន្ត្រីបានគូសបញ្ជាក់ថា កម្ពុជាដែលជាប្រទេសបញ្ជូន សប្បាយចិត្ត​ដោយ​ពលរដ្ឋ​របស់​ខ្លួន​ទទួលបានការគាំពារ និងកិច្ចអន្តរាគមន៍ពីប្រទេសទទួល ហើយប្រទេសទ​ទួលក៏​សប្បាយ​រីករាយ​ដោយ​សារ​មាន​កម្លាំង​ពលកម្ម​ដែល​បំពេញ​កង្វះ​ខាត​ដើម្បី​ធានា​និរន្តរភាព​សេដ្ឋកិច្ច នៃ​ប្រទេសជាតិរបស់ខ្លួន។

 ឯកឧត្ដម​រដ្ឋមន្ត្រី បានគូសបញ្ជាក់ថា៖ “ប្រសិនបើភាគីទាំង៥នេះមិនសប្បាយចិត្តនោះទេ គឺ​ការ​ធ្វើ​ទេសន្តរប្រវេសន៍​មិន​ជោគជ័យ​នោះ​ទេ​ព្រោះភាគី​ទាំង​៥​នេះ​ត្រូ​វ​តែ​សប្បាយ​ចិត្តដូចៗ​គ្នា​ដោយ​គ្មាន​ភាគី​ណាមួយសប្បាយចិត្ត ហើយភាគីមួយទៀតមិនសប្បាយចិត្តនោះទេ”។

សម្រាប់ឯកឧត្ដម​រដ្ឋមន្ត្រី ចំណុចទាំងនេះ គឺជាកិច្ចការអាទិភាព​របស់​ក្រសួង​ដែល​នឹង​ត្រូវ​ធ្វើ​នៅ​អាណត្តិទី​៧នេះ​ ដើម្បីធានាថា​ភា​គីទាំង​អស់​សប្បាយ​ចិត្ត​ក្នុង​គោល​បំណង​ធ្វើ​ឱ្យ​ការ​ធ្វើទេសន្ត​រ​ប្រវេសន៍​ពី​កម្ពុជា​ជោគជ័យ៕