វិទ្យាស្ថានអភិវឌ្ឍន៍មុខជំនាញកម្ពុជា-ថៃ បានសហការជាមួយអង្គការហ្គូដណេសប៊ីសកម្ពុជា រៀបចំ​កម្មវិធីស្ដីពីការ​ចុះ​ផ្សព្វ​ផ្សាយជ្រើសរើសសិស្សឱ្យចូលរៀន ក្នុងឆ្នាំសិក្សា២០២៣-២០២៤ ។

ការចុះផ្សព្វផ្សាយជ្រើសរើសសិស្សឱ្យចូលរៀននេះ បានធ្វើឡើងកាលពីថ្ងៃទី២២ ខែធ្នូ ឆ្នាំ​២០២៣ នៅភូមិឈើទាល ឃុំម្រោម ស្រុកអង្គរជ័យ ខេត្ដកំពត ដោយមាន​ការ​ចូលរួម​ពី​សិស្សា​នុសិស្ស ​អាណាព្យាបាល អាជ្ញាធរមូលដ្ឋានប្រមាណ ២០០នាក់។ 

លោក ប៉េង ប៉ុញារ៉ាស័ក្ត ប្រធានការិយាល័យបុគ្គលិក វិទ្យាស្ថានអភិវឌ្ឍន៍មុខជំនាញកម្ពុជា-ថៃ នៃ​ក្រសួងការងារ និង​បណ្តុះ​បណ្តាលវិជ្ជាជីវៈ បានអោយដឹងកម្មវិធីផ្សព្វផ្សាយនេះ មានគោល​បំណង​ណែនាំ​សិស្ស​ថ្នាក់វិទ្យាល័យ បានយល់ដឹង​ពី​ជំនាញ​ដែលអាច​សិក្សា​បាន​នៅ​ពេល​ពួក​គាត់​បញ្ចប់​ការ​ប្រឡង​មធ្យមសិក្សាទុតិយភូមិកាលពីពេលថ្មីៗកន្លងទៅនេះ។

កញ្ញា ម៉េង សេរីវណ្ឌី បុគ្គលិកគម្រោង និងលោក ឈឹម សុវណ្ណារិទ្ធ មន្ត្រីសម្របសម្រួលគម្រោង អង្គការ​​ហ្គូដ​ណេ​ប៊ីស​កម្ពុជា បានលើកឡើងថា កម្មវិធីផ្សព្វផ្សាយនេះមានសារៈសំខាន់ណាស់ ជួយ​ដល់​សិស្ស​ឲ្យជ្រើសរើសជំនាញ​ដែល​អាច​ជួយ​ដល់ជីវភាពរបស់ពួកគាត់បាននៅថ្ងៃអនាគត។

សូមបញ្ជាក់ថា អង្គការហ្គូដណេប៊ីស គឺជាអង្គការអន្តរជាតិ ផ្តោតលើការងារអភិវឌ្ឍន៍ និង​មនុស្ស​ធម៌​ ដែល​មាន​ទី​ស្នាក់​ការ​កណ្តាលនៅប្រទេសកូរ៉េខាងត្បូង ដែលជាអង្គការមួយក្នុងចំណោម អង្គការ​ហ្គូដណេប៊ីសទាំង ៣៧ប្រទេស ដែលបាន​នឹង​កំពុង​​ប្រតិបត្តិការ​នូវ​កម្ម​វិធី​អភិវឌ្ឍន៍​រយៈ​ពេល​វែង​ និងគម្រោងជាច្រើនរួមមាន ១ កម្មវិធីគាំពារ និងការការពារកុមារ, ២ កម្មវិធី​អប់រំ​, ៣ កម្មវិធីសុខភាព, ៤ កម្មវិធីទឹកស្អាត និងអនាម័យ, ៥ បរិស្ថាន, ៦ កម្មវិធីកសាងប្រាក់ចំណូល និង​ការ​កសាង​ភាព​ជា​ដៃ​គូ, ៧ ការគាំទ្រមតិ និង៨ កម្មវិធីមនុស្សធម៌៕ អត្ថបទ៖ ស៊ូជីង