រថយន្តដឹកជំនួយ បានតម្រៀបជួរនៅផ្នែកច្រកឆ្លងកាត់តំបន់ Kerem Shalom របស់អ៊ីស្រាអែល កាល​ពីថ្ងៃសុក្រ ដើម្បីចូលទៅក្នុងតំបន់ហ្កាហ្សា។ មន្ត្រីយោធាអ៊ីស្រាអែល លោក Moshe Tetro បាននិយាយថា រថយន្តដឹកជំនួយជាង ៥.៤០០​គ្រឿង ដែលដឹកស្បៀងអាហារ ទឹក និងគ្រឿងបរិក្ខារពេទ្យ បានចូលទៅដល់តំបន់ហ្កាហ្សា ចាប់​តាំង​ពី​សង្រ្គាមចាប់ផ្តើម។ ប៉ុន្តែ លោក Tetro បាននិយាយនៅក្នុងសន្និសីទសារព័ត៌មានថា «ពុំ​មាន​ការ​ខ្វះ​ស្បៀងអាហារនៅតំបន់ហ្កាហ្សានោះទេ» ហើយបានលើកឡើងថា រថយន្ត​ដឹក​ជំនួយ​ចំនួន​ ២.៥០០គ្រឿង ដែលមានផ្ទុកស្បៀងអាហារជាង ៥០.០០០តោន បាន​ចូល​ទៅ​ក្នុង​តំបន់​ហ៊ុម​ព័ទ្ធ​ចាប់​តាំងពីសង្គ្រាមចាប់ផ្តើមនៅថ្ងៃទី ៧ ខែតុលា។

ច្រកឆ្លងកាត់តំបន់ Kerem Shalom បានបើកឡើងវិញកាលពីថ្ងៃអាទិត្យ ទី១៧ ខែធ្នូ សម្រាប់​រថយន្ត​ដឹក​ជំនួយលើកដំបូងចាប់តាំងពីពេលនោះមក។

ស្ថាប័នមួយ​ដែលគាំទ្រដោយអង្គការសហប្រជាជាតិ បាននិយាយ​នៅ​ក្នុង​របាយ​ការណ៍​មួយ​ដែល​បាន​ចេញ​ផ្សាយ​ថា មនុស្សចំនួន ២,៣លាននាក់ ដែលជាចំនួន​ប្រជាជន​ទាំងមូល​នៃ​តំបន់​ហ្កាហ្សា កំពុងប្រឈមនឹងកម្រិតនៃវិបត្តិភាពអត់ឃ្លាន ហើយហានិភ័យ​នៃ​គ្រោះ​ទុរភិក្ស​កំពុង​កើន​ឡើង​ជា​រៀង​រាល់ថ្ងៃ ខណៈសង្រ្គាមអ៊ីស្រាអែល និងក្រុមហាម៉ាស កាន់តែអូសបន្លាយ៕