នាយករដ្ឋមន្ត្រីហូឡង់ លោក Mark Rutte បាននិយាយកាលពីថ្ងៃសុក្រថា រដ្ឋាភិបាល​ប្រទេស​ហូឡង់ បានសម្រេចរៀបចំយន្តហោះចម្បាំង F-16 ចំនួន ១៨ គ្រឿងលើកដំបូង សម្រាប់​ការ​ដឹក​ជញ្ជូន​ទៅ​កាន់​ប្រទេសអ៊ុយក្រែន។

លោក Rutte បាននិយាយនៅក្នុងការបង្ហោះនៅលើបណ្តាញ X ថា ការផ្តល់យន្តហោះ F-16 គឺ​ជា​សមាភាព​សំខាន់​បំផុតមួយ​នៃ​កិច្ច​ព្រម​ព្រៀងដែល​បាន​ធ្វើ​ឡើង​លើ​ការ​គាំទ្រ​ផ្នែក​យោធា​សម្រាប់​ប្រទេស​អ៊ុយក្រែន។

យន្តហោះចម្បាំង F-16 ផលិតដោយសហរដ្ឋអាមេរិកដំបូងគេ ដែលប្រទេស​ហូឡង់​បាន​ផ្តល់​ជំនួយ​ដល់​ប្រទេសអ៊ុយក្រែន បានមកដល់មជ្ឈមណ្ឌលបណ្តុះបណ្តាលប្រទេសរ៉ូម៉ានី សម្រាប់​អ្នក​បើក​យន្ត​ហោះអ៊ុយក្រែន កាលពីខែវិច្ឆិកាឆ្នាំមុន។

ប្រទេសដាណឺម៉ាក ន័រវែស និងប្រទេសបែលហ្សិក ក៏បានប្រកាសថានឹងផ្តល់យន្តហោះ F-16 ដល់​អ៊ុយក្រែនផងដែរ។

ប្រធានាធិបតីអ៊ុយក្រែន បាននិយាយថា ការផ្តោតអារម្មណ៍ជាអតិបរមា គឺចាំបាច់ ដើម្បី​ការពារ​ប្រទេស​នៅ​គ្រប់តំបន់ ដែលជោគវាសនារបស់អ៊ុយក្រែន កំពុងត្រូវបានសម្រេច។ លោក​និយាយ​ថា នេះគឺជាពេលវេលាសម្រាប់ការផ្តោតការយកចិត្តទុកដាក់ និង​ការងារ «ដើម្បី​ឲ្យ​យើង​អាច​បន្ធូរ​បន្ថយ​ភាព​តានតឹងបាន។ លោកZelenskyy និយាយថា «ការយកចិត្ត​ទុក​ដាក់​ជា​អតិបរមា​ចំពោះ​ការ​ការពារសម្រាប់ជាប្រយោជន៍របស់រដ្ឋ ហើយថាមពលអតិបរមា នឹងឲ្យអ៊ុយក្រែន អាច​សម្រេច​បាន​នូវគោលដៅរបស់ខ្លួន»៕