សហរដ្ឋអាមេរិកកាលពីថ្ងៃសុក្រ បានចោទប្រកាន់អ៊ីរ៉ង់មានការជាប់ពាក់ព័ន្ធយ៉ាងជិតស្និទ្ធ ក្នុង​ការ​វាយ​ប្រហារ​លើនាវាពាណិជ្ជកម្មដោយក្រុមឧទ្ទាមហួទីនៅប្រទេសយេម៉ែន ដោយ​បង្កើន​សកម្មភាព​យ៉ាង​ខ្លាំងក្លា ខណៈដែលក្រុងវ៉ាស៊ីនតោន ពិចារណាពីវិធានការតឹងរ៉ឹងរួមទាំងកម្លាំង ដែ​ល​អាច​ធ្វើ​ទៅ​បាន។

សេតវិមាន បានចេញផ្សាយជាសាធារណៈនូវព័ត៌មានចារកម្មរបស់សហរដ្ឋអាមេរិក ខណៈ​ដែល​ក្រុម​បះ​បោរ​យេម៉ែនដែលមានទំនាក់ទំនងនឹងអ៊ីរ៉ង់ នៅតែបន្តការវាយប្រហារតាមនាវា ដែល​ពួក​គេ​និយាយថា មានសាមគ្គីភាពជាមួយប៉ាឡេស្ទីន នៅតំបន់ហ្កាហ្សាស្ទ្រីប ជាកន្លែង​ដែល​អ៊ីស្រាអែល កំពុងប្រយុទ្ធជាមួយក្រុមសកម្មប្រយុទ្ធហាម៉ាស។

សេតវិមាន បាននិយាយថា រដ្ឋសាសនារបស់ទីក្រុងតេអេរ៉ង់នេះ បានផ្តល់យានដ្រូន និង​មីស៊ីល​ដល់​ក្រុម ហួទី ក៏ដូចជាព័ត៌មានចារកម្មផងដែរ។

អ្នកនាំពាក្យក្រុមប្រឹក្សាសន្តិសុខជាតិលោកស្រី Adrienne Watson បាននិយាយថា​ «យើង​ដឹង​ថា អ៊ីរ៉ង់បានចូលរួមយ៉ាងជ្រៅ ក្នុងការរៀបចំផែនការប្រតិបត្តិការប្រឆាំងនឹងនាវាពាណិជ្ជកម្ម នៅ​ក្នុង​សមុទ្រក្រហម»៕